Shillong, Lber 19: Ka Central Bureau of Communication (CBC), Shillong, ka la pynlong ia ka prokram ai jingtip ba kyrpang halor ka Swachhata (ka jingkhuid jingsuba) bad ka jingbam ba tei met ha Presbyterian Secondary School, Umphyrnai, ha East Khasi Hills district, da ka jingthmu ban pynsngewthuh ia ki khynnah skul halor ki rukom im kiba koit ba khiah bad kiba lah ban iaineh.
Ka prokram ka la sakhi ïa ka jingïashim bynta shitrhem ki khynnah skul bad ki nonghikai, kaba pyni ïa ka jingpeit bniah ia ki kam kiba ïadei bad ka jingkhuid jingsuba, bad ka jingbam ba tei met.
Ka Kong Palvy Dora Kharkongor, IEC Specialist, PMU, Swachh Bharat Mission (Urban), Tnad pynroi sor, ka la ai jingkren halor ka Swachhata, da kaba ban jur ia ka jingpyniakhlad ha ka tyllong, da kaba kyntu ia ki samla pule ban pyniakhlad ia ki jaboh kiba lah ban pyut bad ki bym lah ban pyut ha ki iing ki sem.
Ka la ban jur ruh ïa ka jingdonkam ka campaign ban ym bret jaboh bad ka la pynphriang ïa ka khubor “Ka Jaboh jong Nga, Ka Jingkitkhlieh jong Nga”, da kaba pynshlur ïa ki samla pule ban pdiang ïa ki rukom treikam ba don jingkitkhlieh ha kaba iadei bad ki jaboh bad ban nohsynñiang sha ka jingpynkhuid ïa ki sawdong sawkun.
Ka Kong O. Sumer, District Health Education Officer, ka la ai jingkren ha kane ka jingïalang halor ka jingbam kaba tei, da kaba pynleit jingmut ha ki mat kiba kongsan kum ka jingduna snam ha ki samla bad ka jingdonkam jong ka jingbam kaba biang.
Ka la ban jur ia ka jingbam ia ki jingbam ba la thung ha la iing bad ki jingbam kiba lah ban ioh ha ka thain, da kaba ban jur ia ki jingmyntoi jong ki ha ka jingtei ia ka met. La pynsngewthuh ruh ia ki samla pule shaphang ki rukom bam kiba tei met bad ka jingdonkam jong ki jingbam kiba don ia ka iron ban iada na ka jingduna snam bad ban pynthikna ia ka jingkoit jingkhiah.
Ban pynskhem ia ki khubor ba kongsan, la pynlong ia ki prokram ba kynthup ia ka jingiakop kylli jingkylli bad ki jingiakop saindur bad dro halor ki phang pdeng jong ka jingkhuid jingsuba bad ka jingbam ba tei met. Ki khynnah skul ki la iashim bynta shitrhem bad ki la pyni ia ka jingsngewthuh jong ki lyngba ka jingsaindur.
Haba ai jingkren ha kane ka sngi, ka Kong B. Kharumnuid kaba dei ka Headmistress jong ka Presbyterian Secondary School ka la ai jingïaroh ïa ka CBC Shillong kaba la pynlong ïa kane ka prokram bad ka la ban jur ïa ka jingdonkam jong kum kine ki sienjam ha kaba pynrung ïa ka jinglong ba don ka jingkitkhlieh hapdeng ki khynnah skul.
Ka la ong ba ka jingpynsngewthuh kloi shaphang ka jingkhuid jingsuba, ka jingpynkhuid ia ki jaboh jabaiñ, bad ka jingbam kaba tei kalong kaba kongsan ban tei ia ka imlang sahlang kaba koit ba khiah bad kaba don ka jingkitkhlieh, bad ka la pynpaw ka jingsngewnguh ia ki resource person na ka bynta ki jingialang ai jingtip jong ki.
La sam ia ki khusnam bad ki syrnot sha ki nongjop ha ki jingiakop kylli jingkylli, art, bad dro dur. Ki khusnam, kiba kynthup ïa ki tiar ba pyndonkam ha ka pule puthi bad ki tiar kiba ïadei bad ka jingkhuid jingsuba, ki long ban pynshlur ïa ki samla pule ban pdiang bad pyntreikam ïa ki khubor jong ka Swachhata bad ka jingbam kaba biang ha ka jingim jong ki kaba man la ka sngi.
