Shillong, Iaiong 07: Mynta ka sngi ka seng Hynniewtrep Youth Council (HYC) kala leit ban ai da ka jinghoh sha u Chief Executive Member (CEM) ka Khasi Hills Autonomous District Council (KHADC), iaka jingjyllei ki bar jylla kiba shong dukan ha Iew Shallang.
Ha ka jingthoh kaba ka long mynta ka sngi ka Hynniewtrep Youths’ Council-West Khasi Hills District ryngkat ka HYC Mawshynrut Circle bad ka HYC Shallang Area Unit hadien ba ngi la hiar ban Khynra iaka Iew Shallang haka 4 Tarik Ïaïong 2026 ngi lap ba kane ka Iew kumba 98% iaka khaïi pateng la bat da ki bar jylla.
Kane ka long kaei kaei kaba sngewsih ba ha West Khasi Hills District tang ia ka tei ka iew ki bar jylla ki ioh rung ban kamai kajih bad khaii pateng bad ha katei ka sngi ngi la lap haduh 180 tam eiei ki dukan ne ki jaka trei ki Barjylla kiba khaïi-pateng ne trei ktah hangtei ki khlem don don ia ka Trading Licence na ka KHADC.
Halor kane ka Jinglap Jong ngi ngi wan ban Kyrpad iaka Burom Jong phi kum u Khlieh jong ka Council kaba lah pynkup bor da ka Riti Synshar ka Ri India ba phin shim kam pyrshah ia kine ki barjylla kiba trei ba ktah bad khaii pateng ha Iew Shallang khlem da ioh bor ne ioh ia ka Trading Licence na ka KHADC.
Ka seng kam kwah ban kdew kti ia kaba ladep hynrei mynta ngi wan da ka Mynsiem ba sngewkhia ban kyrpad rit iaka burom jong phi ba phin sngewbha ban sangeh noh syndon ban ai Trading Licence ia kitei ki Barjylla baroh ha Iew Shallang lada ki wan ban pan ia ka Trading Licence da kaba pyndonkam ia ka bor ba lah ai ha phi katkum ki kyndon lyngba ki ain jong ka District Council.
Hapoh West Khasi Hills District la ka dei ha Iew Rambrai, Iew Maweit, Iew Riangdo, Iew Nonglang bad kiwei khamtam wat Iew Nongstoiñ kaba dei ka District Head Quarter, ngi la lah ban bat ia u lakam ka Khaïi pateng da la ki Parari, te Kan eh aiu ia ka Iew Shallang ruh ba yn bat hi noh da ki Paradoh parasnam na Shallang Area naduh mynta.
Ka por ka dawa ba ka KHADC, ka Hima Nongstoiñ ryngkat ngi ka seng ban iatreilang na ka bynta ban pynkut noh ia ka jingwankhaïi pateng da ki barjylla ha Iew Shallang.
Hooid, kam dei ka kam kaba suk hynrei kam dei ruh kaba eh haduh katta katta. Kaba donkam kadei ka jingsdang bad ka jingskhem jingmut bad ka jingiatreilang jong ki bor ba dei peit ia kane ka kam bad ngi ngeit skhem ba ngin lah ban leh ia kaba donkam baroh. Ia ka shithi la soi da u bah Lumlang Kharsyiemlieh Presdent bad lai ngut kiwei ki nongkit kam ka seng na West Khasi Hills District.
