Shillong, Kyllalyngkot 31: Ka seng longkmie jong ka shnong Umphrup Pdeng shnong kala pynpaw ia ka jingsngewnguh ia u MLA bad MDC barim jong ka Nongkrem Constituency, uba la pynioh ia ka scheme na ka bynta ban shna ia ka office trei kam jong ka seng na ka bynta ban pyntyllun ia ki kam jong ka seng longkmie.
Kane ka jingpynpaw ka seng long kmie Pdeng Shnong Umphrup kala wan hadien ba u Bah Lambor Malniang u la leit ban plie paidbah ia ka office trei kam jong ka seng long kmie ha ka jingsakhi lang ki long kmie ka shnong Umphrup, Pdeng Shnong bad ki nongkitkam ka shnong Umphrup Pyllun.
Na ka liang u Bah Lambor Malniang u la pynioh ia kane ka scheme na ka Chief Minister Social Development Fund (CMSDF) ha ka mang tyngka T.2,03,000/-, ha ka jingsakhi lang u Bah Wanshon Nongspung uba dei u Rangbah Shnong ka Dorbar Shnong Umphrup Pyllun.
Haba kren u Bah Lambor u la pynpaw ba u dap da ka jingkmen ba u la ioh ban plie paidbah ia kane ka office, hynrei un da kmen palat lada u iohi ba kane ka office kala trei kam pura na ka bynta ka bha ka miat jong ka shnong hi baroh kawei.
