Shillong, Nailar 21: Ha ka jingpynbna ba la mih haka 18th Nailar 2023, na ka ophis jong ka Excutive Committee ka Khasi Hills Autonomous District Council. Kaba pynpaw ba ia u syiem jong ka hima langrin u Nangtei Sing Syiemiong u la shah weng shipor na ka kam long syiem.
Halor katei ka phang na ka liang ka seng samla Hima Langrin mynta ka sngi ha ba iakren bad ki lad pathai khubor ha shillong press clubs, u bah Pynshailang Lyngdoh u President u pynpaw ia ka jingsngewnguh bad ai khublei ia ka ia ki paitbah bad ia ka KHADC.
Na ka liang u bah Pynshailang Lyngdoh u la ong ba kene ka jingshah weng nong u syiem Nangtei Sing Syiemiong kum u syiem ka long ka jingjop jong ki paitbah jong ka hima
Ha kajuh ka por na ka liang ka seng samla hima langrin, u bah Pynshailang , u la pyntip sha ki paitbah na ka liang ka seng samla hima langrin kan weng noh ka jingiakhih ba la pynkheh halor kane ka phang.
U president ka seng u la kyntu ruh ia ki paitbah ka hima Langrin ba lada ka hima ka khot kino kino ki jingialang paitbah, lane ki jingpynshai paitbah, u la kyntu ia ki paitbah ka hima ba kin shim ka jingkitkhia ban poi sha ki jingialang.
