Shillong, Iaiong 06: Na ka liang ka Hynñiewtrep Youths’ Council-Seng Kmie, ngi dap da ka jingsngew kmen ban ai Khublei Shad Suk Mynsiem ïa baroh ki para Ri, ki para kur ki para kha, ki para kher ki para mer.
Ka Shad Suk Mynsiem ka don ïa ka dur ba maïan kaba pyni ïa ka dur ba pura jong ka Jaitbynriew u Hynñiewtrep ha kaba u Shynrang u shad tawiar kum u nongda nongker ïala ka jong ka Longing Longsem, Longkur Longjait bad ïala ka jong ka Jaitbynriew.
Hynrei ka kynthei pat kaba shad ha pdeng, ka dei ka nongri nongsumar ïala ka jong ka kur ka jait, ka burom ka akor jong ka long rynieng, ka longing longsem bad ïa ka Riti ka Dustur jong ka Jaitbynriew.
Ai ba kane ka jingmut kaba la shon shap ha ka dur jong ka Shad Suk Mynsiem kan dang suhsieng ha ngi iwei pa iwei ba ngi dei ban kynmaw ban ïada bad pynneh pynsah ïala ka jong ka Riti ka Dustur bad ka Niam ka Rukom jong ka Jaitbynriew.
Ka seng ka sngew ban ai Khublei ruh ïa ka Seng Khasi kaba la lah ban ïeng rangbah ban pynneh pynsah ïa kane ka Riti ka Dustur jong ka Jaitbynriew bad dei lyngba ka jingtrei borbah jong ka, ba ka Riti ka Dustur ka dang neh kumne kumba ka long.
To u Blei Trai Kynrad un dang kyrkhu kyrdoh bad u dang pynshait bor ïa ngi baroh lang ban dang im tip briew tip Blei, tip kur tip kha bad kamai ïa ka Hok bad ba un dang ïai kyrsoi ruh ha ngi ïa ka jinglong tylli kum kawei ka Jaitbynriew.
“Pansngiat theisotti ba janai ha Ri Khasi, Symphiah bad Thuïa ruh ki nguh baroh arti. Burom ka Ri kan neh tyrsem La ka Riti ha ka Shad Suk Mynsiem”. Kane ka long ka kywah kaba la soi da u President rangbah ka seng u bah Rou Kupar Synrem.
