Shillong, Risaw 30: Mynta ka sngi u Myntri rangbah ka jylla u Conrad K Sangma u la aiti ia ka jaka sha Mawpdang Mawkhanu ha New Shillong Township sha ka National Law University,ia kaba la pdiang da u nongbishar ba rangbah ka High Court ka jylla Meghalaya u Sanjib Banerjee,ha ka jingiadon lang ka myntri kam ain ka Dr Ampareen Lyngdoh bad u myntri ba dei peit ia ka tnad pule u Rakkam A Sangma.
Ha ka jingkren u myntri rangbah ka jylla u Conrad u la ong ba ka sorkar ka shai bha ba ka kwah ban kyntiew ia ka jylla kum ki riew kiba la kiew bad ka jylla mynta ka iaid sha kata bad ban kyntiew ia ka ioh ka kot don kam ia ka jingsdang la ka long ha kano kano ka bynta.
La ong ba ka Ri India ka dang dei ka rit kaba dang khynnah kumta man ki khun samla ki don ia ka bynta ban kyntiew ia ka ri la ka long ha kano kano ka rukom na ka bynta ka jingkiew jong ka Ri bad poi sha kata ka thong don kam ia ka jingiarap ia ki khunsamla ba kin lah ban noh syniang kylla sha ka Ri.
U Myntri rangbah ka jylla u la ong ba ka sorkar kala shim bun ki lat ki lynti ban tei ia ki jngtei kiba don kam na ka bynta u paidbah ha ki jingpule ha ki kyrdan kiba kham sha jrong khamtam ha ki jingpule.
U myntri rangbah ka jylla u la ong ba ki jaka ai jinghikai kim dei ban long tang ki jaka ai jinghikai ia ki samla pule sha ki kyrdan kiba kham sha jrong hynrei kidei ban long ki jaka ruh kiba ia teilang bad ka sorkar ban weng ia ki jingeh bad ka jingnang jingstad kan iarap ia ka sorkar.
Ha ka jingkren u nongbishar ba rangbah ka jylla High Court ka jylla Meghalaya u Justice Sanjib Banerjee la ong ba u kwah ba ka jaka pule kan long ka jaka kaba ai ai mar kylliang bad u la ong ba u kwah ban iohi ba ha ki por ban sa wan kan kham pynrung shibun ki samla pule na ka jylla.
Ha kane ka sngi bala aiti ia kane ka jaka ban tei ia ka National Law University la don lang ki nongbishar ka High Court ka jylla Meghalay, u Vice Chancellor, National Law University, Meghalaya, Professor Indrajit Dube, Secretary ka tnad ain , C V Diengdoh bad u Member Secretary, New Shillong Township Development Agency, E Kharmalki.
