Shillong, Iaiong 06: Ka seng ki samla pule Jaintia Student Union, kila pynpaw ka jingsngewnguh ba khraw ia ka sorkar Meghalaya Democratic Alliance II halor ka jingpynioh ia ka Centre ha kaba iadei bad ka jingthoh Exam MPSC.
Haba kren bad ki lad pathai khubor u samla Neil Mukhim uba dei u General Secretary ka JSU seng kmie u la pynpaw ba ki dap da ka jingkmen ba khraw ba baroh kawei ka ri Lum Jaintia kala ioh centre.
Halor kane u samla Neil u la pynpaw ka jingai khublei ba kyrpang ia u symbud myntri ranbah ka jylla u Bah Sniawbhalang Dhar bad ia ka sorkar MDA II kaba la ialam da u Conrad K Sangma kiba la pynioh bhah lang ia ka centre jon ka MPSC.
Shuh shuh u Neil u la pynpaw ba kane kadei ka jingangnud ba la slem bha jong ki khun samla ka ri lum Jaintia naduh ki por ba mynshwa namar shibun ki jingeh kila ia kynduh ha ka por ba wan thoh exam ha Shillong.
“Ka jingeh ba ki khun samla ki ju ia kynduh kadei ha ka dheng kali bad kaba khraw kadei ha ka jinglut jingsep khamtam eh ia kito ki samla kiba wan na ki long iing kiba duna ha ka ioh ka kot” u la ong.
Ha kajuh ka por u la ai khublei ruh ia ka sorkar kaba la pynioh ia ki centre bapher bapher kum ka CUET bad kiwei kiwei ki jingdonkam jong ki khun samla.
