Shillong, Iaiong 15: Ka long kaei kaba pynlyngngoh bad kaba pynlehrain ruh iaka sorkar jylla ba ki don ki skul sorkar haka thain Mawsynram kiba la shah iehbein khlem don ba phai khmat la ka long naki nongmihkhmat ne ki bor ba dei peit jongka tnad pule puthi jongka jylla.
Kine ki jingshah niewbein ki la paw pyrthei hadien ba ki dkhot bad Nongialam ka KSU South West Khasi Hills District ki la leit jurip , maramot bad syrdep iaki jingjot jingpei jong kine ki skul haka 14/04/2022 hapoh ka jingialam jong u samla Jiedskhem Nongsiej General Secretary KSU South West Khasi Hills District) bad u samla Evansroy Nongrem Education Secretary KSU South West Khasi Hills District.
Ka jingjot jingpei jong kine ki skul ka la long shaba palat Kat haduh ba ki nongshongshnong ki la iathuh ba ki khynnah ki hap ban kup shatri haka por slap lada ki kwah shong class bad nalor kata ka duna ruh haki jingdon iaki tiar ba ju pyndonkam man ka sngi kum ki Ben, ki desk , ki blackboard bad kiwei kiwei. Kumta ka seng ha kane ka sngi ka la noh synniang daki tin , ki desk , ki whiteboard bad kiwei kiwei lyngba ki jingianoh synniang hi bormet jongki dkhot jongka.
Kine ki skul ki dei ka Nongshluid Government LP School ( ka skul kaba la seng naduh ka snem 1920) bad ka Kenshluid Government LP School kiba dei ki skul ba don hapoh Mawsynram C&RD Block bad kiba dei ki shnong ba hap ban iaid kjat 2 haduh 3 kynta namar ym pat lait kali.
Kane ka jingleit hiar jong ki dkhot ka seng ka la pynlung mynsiem iaki nonghikai bad ki nongshongshnong ha kaba ki la ong ba ka dei ka sien ba nyngkong eh ba yn don kiba wan ban jngoh ban ïakren ïa ki jingeh ki paidbah kane ka thaiñ.
” Ym pat ju don mynno mynno lane mano mano ruh ban wan jngoh ïa ka skul ne shnong jong ngi wat hadien shispah snem ki jingshakri kane ka skul. Ka Seng jong phi ka dei kaba nyngkong eh ban wan ha ryngkat ka jingshahshitom jong phi ban shah ia u slap ha ka lynti iaidkjat ba 2/3 kynta ban bah ia ki ben bad desk” la pynsngew daki nongshongshnong.
Ka jingleit hiar ban iarap bad synniang lang jong ka seng ia kine ki skul ka long hadien ba ka Education Cell jongka KSU South West Khasi Hills District ka la ioh ban leit jurip la Ar sien ar wat kata haka 15/02/2022 bad haka 21/02/2022 ha kaba kum ka seng ngi la iohsngew iaki jingud jingnam jongki nonghikai.
Ki khynnah skul bad ki nongshongshnong jongka thain watla ki bun ki khynnah ba pule ha kine ki skul sorkar. Watla ki dei ki skul sorkar kiba ha ka jingshisha dei ki bor sorkar ki ban peit bad sumar bha hynrei haba ka sorkar ka leh Matlah kumta na ka Liang jongka KSU ngim banse ban leh hi ia la ka bynta mynta ka kynti.
Ha ka jingjurip jongka seng ngi la lap ba bun ki kamra ki la pra bad ki tnum ruh ki la pei nalor kim don iaki tiar ki tar kiba biang ba dei ban pyndonkam man ka sngi . Ngi la lap ba don ki kamra shet ki la pra nalor ba ym shym la don ba maramot shuh naka liang ki bor sorkar iaki tnum, ki painkhana bad kiwei kiwei.
Ka seng ka pynpaw iaka jingsngewsih bad ka jingsngewkyndit namar dang shen ngi la iohi ba ka don ka jingpynshai hapoh Assembly ba ki skul sorkar ki bit ki biang haki thain nongkyndong hynrei kaei ba kum ka seng ngi lap pat ki long markhongpong ha kaba kam shym la don ka jingkhein snep jongka sorkar ban kyntiew iaki skul khamtam haki thain nongkyndong.
Kine ki shu dei tang ki katto katne ki nuksa hynrei kiba bun ki shlem ai jingnang jingstad ne ki skul sorkar haki thain nongkyndong ki shait shah iehbein ha kane ka rukom.
Naka liang ka Education Cell jongka KSU South West Khasi Hills District kan sa lum sa lang ia ki jingeh haka pule puthi jongka thain nongkyndong bad shen ngin sa leit ban iakynduh iaki bor ba dei peit jongka tnad pule puthi ban pynsngew halor ki bynta jongka pule puthi haki thain nongkyndong. Kane ka dei ka kyrwoh na u samla Evansroy Nongrem, Education Secretary KSU South West Khasi Hills District.
