New Delhi, Rymphang 25: Ha ka sngi ba ka seng Hynniewtrep Achick National Movement ka la pynlong ia ka jongkhih, sha Nongbah Delhi ban dawa pynrung ia ka ktien Khasi ha ka kyrnit kaba phra ka riti synshar ka ri bad ban dawa pyntreikam noh ia ka ILP hapoh ka jylla.
Ki dkhot bad ki nongkitkam ka seng Hynñiewtrep Achik National Movement ka seng kum ka dak ban pynpaw ia ka jingiashim bynta ha katei ka jingiakhih ka seng ha Nangbah Delhi ki la pynlong ka jingteh ia ki jingthoh ba pher ba pher ha ki bynta jong ka nongbah Shillong ha ki bynta ba marjan u motdur sah kynmaw u Woh Kiang Nongbah ba don ha jan Civil hospital Shillong, ki bynta jong ka khyndailad ter ter shaduh Motphran bad kiwei ki jaka.
U General Secretary ka seng HANM Mawlai Unit u la ong ba kane ka jingteh ia ki jingthoh ha bun jaka ha ha Shillong ka long ban ai jingkyrshan pura ia ki nongialam jong ka seng HANM ki ba leit ban dawa na ka sorkar pdeng ban pynurlong noh ia ki mat ba ka seng ka la dawa, namar ka jingleit iakhih ki dkhot ka seng ha Delhi ka la dei ka sien ka ba ar.
Kane ka jingiasnoh kti lang ki dkhot ka seng ha shillong ka long ban pynpaw ba ia kine ki mat ba ka seng ka la dawa ka sorkar India kan ai noh, namar kine ki mat ki long kiba la donkam ha ka bri u Hynniewtrep.
