Shillong, Nohprah 11: U National Youth President ka National people’s Party u bah Miky Nongkhlaw u la buh ka jingkylli ba balei u Dr Mukul Sangma nongialam ka liang pyrshah u kwah leh politic ia ka jingdawa Inner Line Permit ki paidbah ka jylla.
Haba kren ha ki Lat pathai khubor mynta ka sngi ha ophis trei kam jong ka party ha Lachumier u la ong ba u Dr Mukul u la shu kwah ban kynthoh ia kane ka sorkar Meghalaya Democratic Alliance na ka por sha ka por wat la ka sorkar kala pynshai sha bar bad wat hapoh iing dorbar ruh kum juh.
U la ong ba balie kine ki nongialam ki kwah ban pynlut ia ka por ha kaba kwah ban ialeh politic ha kaba ki lah ban pyndon kam ia ka por jong ki na ka bynta ban trei ha ki konstitwensi, la ong ba dei tang kane ka sorkar MDA kaba la sngap ia ka jingdawa jong ki paidbah ha kaba pdiang ban pyntrei kam ia ka ILP ha kane ka jylla.
Haba ia dei bad ka ain Meghalaya Residence Safety and Security Act, kaba la shna ha ka por jong u ka dei kaba ain kaba khlem pat biang dei ka jingstad jong ki paidbah ban pynkhlain shuh shuh ia kane ka ain bad kane ka sorkar kala wan rah ia ka jingpynkylla ban pynkhlain bad halor kane u myntri rangbah ka jylla bad u Lat ka jylla ki ia kren halor kane haduh ka tnad kam poh iing jong ka sorkar pdeng.
U bah Anthony Nongbri u la ong ba ki paidbah kim lah ban klet ia ka jingiakhih ban dawa ILP ha u snem 2013 ha kaba bun kila ngat ha ki jingjia kiba sngewsih ha ka por ba long Myntri Rangbah u Dr Mukul hynrei ha kato ka por ka sorkar Congress kala ong em ia ka ILP.
Lada u Dr Mukul u la shim ia karai ban pyntrei kam ia ka ILP kumba pdiang kane ka sorkar MDA kaba mynta kan long kaba suk namar ba ha Meghalaya ruh sorkar Congress bad ha Delhi ruh Sorkar Congress hynrei um shym la pdiang ia ka ILP ha katei ka por.
Halor ka jingkynnoh ia u myntri rangbah mynta ba u leit sha bar Ri, u Dr Mukul ruh umd ei ban klet ba ha ka jinglong myntri rangbah jong u ruh u leit sha bar ri bad u la ai dawa ba u leit ban wat jingtip.
U Nongbri nongialam ka NPP u la ong ba dei ka jingbym don ia ka jingkit khlieh u Dr Mukul ha ka por ba u long myntri rangbah wat ia ka committee kaba ka sorkar jong u la thaw ha u snem 2012. Ha katei ka por la don ka Committee ban leit jurip ia ka rukom pyntrei kam ia ka ILP ha kiwei ki jylla ha kaba u bah Bindo M Lanong ha katei ka por u long Symbut myntri Rangbah la thung ia u kum u shongknor.
Katei ka Committee kaba kyntup ia ki District Council ki khlieh nongsynshar bad kum juh ruh ki seng bhalang kila ai ia ka kaiphot sha ka sorkar ba dei ban dawa ban pyntrei kam ia ka ILP ha kane ka jylla hynrei ka sorkar jong u Dr Mukul kala kyntait ia kata.
Dei kane ka sorkar MDA ha dien ba kala wan ha ka bor kala pynbha ia ka MRRSA bad kala sngap ruh ia ka jingdawa ki paidbah ban pyntrei kam ia ka ILP ha kane ka jylla da kaba shim ia ka rai hapoh ka iing dorbar bad dei tang kane ka sorkar kaba la shim ia ka rai bad kane ka jingiakren ka dang iaid mynta bad ka sorkar pdeng bad kum ki nongialam party ki pynpaw ka jingsngewnguh ia ki paidbah ba ki ai ka jingkyrshan ia kane ka party NPP bad ba kin dang bteng ban ia ia ka jingkyrshan ia ka party.
