Shillong, Lber 13: Ki paidbah ka Meghalaya ki la iphylla shibun eh haba u Prime Minister Narendri Modi bad u Home Minister,u Amit Shah ki leh myn leh kitkhia ba ki ieit ia ka Meghalaya da kaba wan khah khah sha Shillong khlem poi pyrkhat satia.
Tang hapoh shi bnai ki la wan haduh ar sien kynthih.Lada don kiba smat ban pyrkhat bha,kin sa lap hi ia ka daw bah balei ki leh kumne.Kim da salia shuh wat ban don tang da ki kynta ruh tang ban pynpaw ba ki don lang ha Shillong.
Ha ka por ba u wan kanbas elekshon,ki paidbah kim da sngew pher than.Hynrei ba kin wan khnang ban sakhi ia ka jingsmai ka sorkar MDA jong u Conrad Sangma,kata te, kaba don ka jingmut sha lyndet bad ruh kham sha jngai shuh shuh.Kumno kat u Prime Minister bad u Home Minister kin da wan khnang tang hapoh shi kynta ei ei khlem da don ki daw kiba lah ban pyn myntoi ia u bad ia ka party BJP nalor ba ka BJP ka jop tang ar seat bad ioh minister ruh tang uwei.
Ka daw bah ba kongsan hi kaba u Modi bad Amit Shah ki wan khnang ban sakhi ia ka jingsmai ka sorkar MDA-II jong u Conrad Sangma kalong ban rah bad pynpaw pyrthei ia ka khubor(message) sha baroh kawei ka ri India ba ka Meghalaya ruh kum kawei na ki Christian state ba kham paw eh ha North East ki la ngeit bad kohnguh(convinced) ban ai ka jingshaniah kaba pura ia ka party BJP da kaba rieh tngen ha ka party NPP.
Ka pyrthei baroh kawei kan tip shai kdar mynta ba,lait noh sa tang ki Muslim, ki Christian mynta ki la don lang bad ai ka jingshaniah ia ka party BJP.Kane ka buit poh(hiden plan) kalong kaba ma bad ba shyrkhei shibun ia ki briew kiba shong ba sah ha Meghalaya khamtam eh ki Khasi-Jaintia jongngi.
Ki tribal states jong ka North East baroh naduh ka state Nagaland,Manipur, Tripura bad Meghalaya ki la ngop lut mynta ha ka jingpyniaid ka sorkar BJP na Delhi.
U Modi bad ka party BJP mynta ki la lah shisha ban pyni bad ban pyn ngeit hakhmat ka ri India baroh ba ka Uniform Civil Code(UCC) ka CAA, ka jingthaw thymmai ia ka Riti Synshar jong ka ri India na ka bynta ka jingmyntoi ka BJP bad RSS ym don jingeh shuh namar ba ka la jop lut ia ki riewlum ka North East India baroh kawei.
Mynta ka la paw shai kdar ba ka NPP ka dei shisha kawei na ki party kiba iajan bad ia sngewthuh jingmut lang shisha bad ka Party BJP.U Modi u shaniah ba wat lada kam jop ka BJP ha Meghalaya ruh hynrei shi sien ba la jop ka NPP kum ka paralok ha ka sorkar NDA ha Delhi bad kawei na ki nongkyrshan ba radbah ka NEDA ha North East,kata hi ka la biang ia u bad ia ka BJP.
Nangne shakhmat lei,ki kam jongki, kin kham shyrkhei shuh shuh ban ia kaba ki la leh ha kine ki san snem ba la dep.Lada jia ei ei ia ka ri bad ka jait bynriew jongngi,ym donkam shuh ban ia ud ne tei pop da kumwei pat.Ka pop jongngi kan sa lap iangi shisien ha kawei ka sngi.
