Shillong, K.Lyngkot 29: U Myntri Rangbah ka jylla u Conrad K Sangma u la buh ia u Mawnongrim ban pynheh bad ban pynbha ia ka surok Pasyieh-Garampani, kane ka jingpynneh bad pynbha ia kane ka surok kan long 26.982 km ha ka jinglut kaba T.62.49 klur tyngka.
Ha ka jingkren jong u myntri rangbah ka jylla haba ba buh ia u mawnongrim ban pynneh ia kane ka surok u la ong ba kumba ka long mynta la iohi ia ka jingpynbun ban shna ia ki surok ha ka jylla na ki skhim bapher bapher bad kane kam dei tang ha kawei ka bynta jong ka jylla hynrei ha baroh kawei ka jylla.
Na ka liang jong u myntri rangbah ka jylla u la ai khublei ia baroh ki tnad sorkar kiba la lah ban pynpoi ia ki kam pynroi sha baroh ki dong bad ki thain ha ka jylla, u myntri rangbah u la long ba long ruh kiba la khreh ban wat ia ki lat ki lynti ban kyntiew ia ka ioh ka kot ha ka jylla.
U Myntri Rangbah u la ong ba ka rep ka riang bad ki kam jngohkai pyrthei kin long ki bynta kiba kongsan ban kyntiew ia ka ioh ka kot jong ka jylla kine kip or ki ban san wan. U la ong kumba ka long mynta ki briew na kylleng ka pyrthei ki thied ia u Shynrai Lakadong.
U Myntri Rangbah u la ong ba ka jingthied jong ki briew ia u shynrai na Lakadong, kam mut ba ki briew ki kwah tang ban thied ia u shynrai, hynrei ka jingthied jong ki briew ia u Shynrai Lakadong ka dei namar ka jingdon ia ka bor dawai kaba don ha u shynrai ba mih na lakadong.
U Symbut Myntri Rangbah ka jylla u bah Prestone Tynsong u la ong ba ynda la dep ban shna pynbha ia kane ka surok yn sa jer kyrteng da kumwei pat, na ka liang jong u bah Tynsong u la kyntu ia ki paidbah ba kin ia treilang bad u kontraktor ban pyndep ia ka jingtrei ha ka por kaba la buh.
Kane ka surok ka pyniasoh bad ka NH-16 na jan shnong Saphai ka khappud bad ka jylla Assam kane ka surok ka don 46.982 km hynrei ka jingpynbha bad pynheh ia kane ka surok kan long tang 26.982 km bad ia ka pisa la mang na ka skhim Meghalaya Integrated Transport Project.
Ia kane ka jingtrei yn pyntrei da ka kompnei Rocky Dhar JV Dhar Construction Company ha ka jinglut kaba T.62,49,18,004 tyngka bad la buh por ba ia ka jingtrei hapoh 42 bnai. Ha kane ka juh ka sngi u myntri rangbah ka jylla u la leit ban buh ia u mawnongrim jong ka madan kynjat boll kaba heh duh ha Jaintia Hills ha shong Wahiajer.
Ha kane ka sngi la don lang ruh u bah Sniawbhalang Dhar myntri ka sorkar jylla, u bah Comingone Ymbon bad u bah Nujorki Syngoh baroh ki MLA. Ha kane ka sngi ki paidbah nongshong shnong kila ia don lang ban sakhi lang ia kane ka sngi sah kynmaw ha kaba pynheh ia ka surok.
