New Delhi Kyllalyngkot 09: U Paban Singh Ghatowar myntri ba dei peit ia ka tand Development of North Eastern Region (DoNER) mynta ka sngi u la plié ia ka jingilang kaba phra jong ki nngkhaii kane ka thain ha ka nongbah Delhi. Ka jingialang ka long ban khring ia ki briew na kiwei ki bynta jong ka pyrthei ban wan bei pisa ha kane ka thain.
Ha ka jingkren ka jong u kum u kongsan ha kane ka jingialang u la ong ba ka thain baroh kawei ka don kam ia ka jingshong suk shong sain na ka bynta ban kiew ha ka rai ka par, u la kubur ba ki don ki jingeh kiba ia shem hynrei ia kine lah ban pynbeit da ka jingiakren ia suk.
Na ka liang jong u myntri u la ong ba ka long kaba sngewlyngoh ban iohi ba wat la ka dong shatei lam mih ngi jong ka Ri India ka don ia ki lad ki lynti ba lah ban kyntiew ha ka kamai ka jih hynrei ka duna ha kiba bun ki liang bad bun na ki riew shimet kiba wan sha kane ka thain ka long beit tang ha jong ka sor Guwahati.
Haba kren ia ka jinglong ka thain baroh kawei u la ong ba ka jingphiah ia ka Ri India ha u snem 1947 ka la wanrah ym tang ia ka jingsah dien kane ka thain hynrei ka buh ruh ha ki shibun ki jingeh. Ban kyntiew ia ka kamai ka jih kane ka thain dei tang ban pynkhlian ia ka khaii pteng bad ki ri ba marjan.
Na ka liang jong ka sorkar pdeng bad ki sorkar jylla ki la leh bun kiei kiei ban khring ia ki briew ba kin wan ban bei pisa ha kane ka thain, bun na ki briew ki la pyni ia ka jingkloi ka jong ki ban wan hynrei kiba poi shisha ka long tang khyndait.
Na ka liang jong ka sorkar pdeng ka ioh ba kane ka thain ka don kam ia ki surok dei na kane ka daw ba ka jingbei pisa jong ka sorkar pdeng ka long kaba bun bha ha kane ka liang, ban kham pynsuk shuh shuh ka sorkar pdeng ka la buh ba kano kano ka shnong kaba don 250 ngut ki nongshong shnong kin ioh ia ka surok na ka skhim PMGSY.(SP News)
