Shillong Iaiong 08: Ka Employees’ State Insurance Corporation (ESIC), North East Zone, ka la pynbna mynta ka sngi ia ka jingpyntreikam ia ka skhim Employees’ State Insurance (ESI) ha baroh ki district jong ka jylla Meghalaya kaba la sdang naduh ka 1tarik Iaiong, 2026, kaba long ka sienjam kaba kongsan sha ka jingiada ia ka imlang sahlang ha ka jylla. La pynbna ia kane ha ka jingialang bad ki lad pathai khubor ha nongbah Shillong, ha kaba ki heh sorkar ki la batai ia ka jingpyniar bad ka jingktah jong ka ia ki nongtrei bad kiba haiing jong ki.
“Lyngba kane ka skhim, ngi thmu ban poi sha uwei pa uwei u nongtrei uba dei hok bad ban ai ïa ki lad jingsumar ba bha tam ryngkat bad ki jingmyntoi kiba donkam ha ka liang ka pisa tyngka, ban pynthikna ïa ka jingïada ha ka imlang sahlang bad ka ioh ka kot jong ki,” u la ong.
Haba batai bniah shaphang ki jingmyntoi, u Sinha u la ong ba ka skhim ka ai jingkyrshan pisa kaba pura kynthup ïa ka jingmyntoi na ka bynta ka jingpang jingshitom, ka jingmyntoi na ka bynta ka jingkha khun, ka jingmyntoi na ka bynta ka jingduna ha ki dkhot met bad ka jingmyntoi na ka bynta kiba u nongtrei u kyrshan lada jia ba u nongtrei u ïap namar ka jingmynsaw ha ka kam.
U la ban jur shuh shuh ba ka Jylla Meghalaya ka don ïa ka jingïadei kaba la slem bha bad ka Skhim ESI, kaba la sdang nyngkong eh ha East Khasi Hills ha u snem 1980 bad hadien la pynïar sha Ri Bhoi district bad mynta la pynïar shuh shuh sha baroh kawei ka jylla.
Kumba ka long mynta, ka jylla ka don 28,263 ngut ki briew ba don insurance, kaba kynthup 1,982 ngut ki nongpyntreikam bad kumba 1.1 lak ngut ki nongioh jingmyntoi. Ia ki lad ai jingsumar mynta la pynbiang lyngba ki artylli ki dispensary jong ka ESIC kiba don ha Shillong bad ha Byrnihat, ha ryngkat ka Secondary Care Unit ha Bethany Hospital bad ka super specialty treatment unit ha PA Sangma International Medical College and Hospital ha Ri Bhoi.
Khnang ban pynkhlaiñ shuh shuh ïa ka jingai jingshakri, la mynjur ïa saw tylli ki Dispensary-cum-Branch Office (DCBO) kiba thymmai ha Jowai, Tura, Nongstoiñ, bad Khliehriat khnang ban pynthikna ka jingpynsaphriang kaba kham iar ha baroh ki district.
Ha ka jingbatai shaphang ka jingsuk ban ioh bynta, u Sinha u la ong ba ka rukom pynrung kyrteng hapoh ka skhim ka long pura lyngba ka lad digital bad kaba pyniaid lyngba ka rynsan ESIC bad Shram Suvidha. U la ong ba ki jaka treikam kiba don palat shiphew ngut ki nongtrei ki hap ban pynrung kyrteng hapoh ka Ain, bad ba ki nongtrei kiba kamai haduh T 21,000 ha ka shi bnai (T 25,000 na ka bynta kito kiba don jing duna ha ka dkhot met) ki lah ban ioh ia kane, da ka jingnoh synniang kaba la buh ha ka 0.75% na ka bynta ki nongtrei bad 3.25% na ki nongai kam.
Haba kdew ia ka jingthmu kaba don ha lyndet jong ka jingpyniar stet, u Sinha u la ong, “Hapoh ka jingialam bad ka jingthmu kaba shai jong u Myntri Sorkar Pdeng ba dei khmih ia ka tnad Labour & Employment, u Mansukh Mandaviya, ka ESIC ka thrang ban pyniar ia ka jingpynpoi jong ka sha man la ki distrik ha ka ri khnang ba yn ym don u nongtrei uba duh ia ki jingmyntoi ha kaba iadei bad ki lad jingsumar bad ka jingiarap pisa.”
Shuh shuh u la bynrap ba ha kaba iadei bad kane ka jingthmu, ka ESIC ka la lah ban kiew sted ha jylla Meghalaya, da kaba pynïar ïa ka jingpynbiang tang na ki artylli ki district sha baroh khatar tylli ki district hapoh ka por kaba hynriew haduh phra bnai. U la pyntip ruh ba dang shim ïa ki sienjam ban pynkhlaiñ ïa ki jingdon jingem, kynthup ïa ka jingthmu ban tei ïa ka ESIC Hospital kaba don 100 jingthiah ha Shillong, na ka bynta kane la dep ban pynbiang ia ka jaka da ka Sorkar Jylla bad la khmih lynti ba shen yn sa sdang ban tei.
U Sinha u la ban jur ruh ba ka ESIC ka ai ki lad jingpule kiba kongsan lyngba ki seat MBBS bad BDS ba la buh kyrpang na ka bynta ki khun jong ki briew kiba la ïoh insurance hapoh ka bhah jong ka NEET, ryngkat bad ki jingsiew kiba kham duna haba ïanujor, da kaba ai jingmyntoi shuh shuh ïa ki longïing jong ki nongtrei.
Da kaba ban jur ia ka jingpynsngewthuh bad ka jingpynsaphriang jingtip, u la ong ba ka ESIC kan sdang ia ki campaign ba kynthup ia ki jingjurip, ka jingiatreilang bad ki nongpyntreikam, ki jaka peit bniah ia ka koit ka khiah, bad ki sienjam pynbna paidbah kiba heh ban pynthikna ia ka jingpynrung kyrteng kaba bun bad jingpynsngewthuh hapdeng ki nongtrei bad ki nongpyntreikam. U la ong ruh ba ki sienjam ki dang ïaid shakhmat ban kyntiew ïa ka camp office kaba la don lypa ha Shillong sha ka Sub-Regional Office, ka ban kyntiew ïa ka rukom treikam bad ka jingai jingshakri hapoh ka jylla.
