Shillong,Lber 24: Mynta ka sngi 24/Lber/2026 ki kynhun seng bhalang bapher bapher na Garo Hill, ki nongialam niam ki riew rangbah kila ia kynduh ia u Lat ka Jylla u C.H. Vijayashankar bad ha kane ka jingiakynduh kila kyntu ia u Lat ka jylla ban pyntikna ba kino kino ki ban iakhun ia ka MDC elekshon sha ka Garo Hills Autonomous District Council ki dei ban don ia ka syrnot Schedule Tribe.
Haba kren ha ki lat pathai khubor u Tensak Z.Momin u president jong ka GSU u la ong ba kane ka jingiakynduh ka jong ki ia u Lat ka jylla ka long halor kawei ka mat bad kata ka long ba kino kino ki ban iakhun ia ka elekshon MDC ha GHADC ki dei ban don ia ka syrnot Schedule Tribe.
Ha kane ka jingiakynduh la iathuh ba u Lat ka jylla u la shahshkor ia kaei kaba ki riew rangbah, ki nongialam niam, ki seng bhalang bad ki riew paw khmat ha kaba baroh kila don 26 ngut ha kane ka jingiakynduh ia u Lat bad kila pynsngew ia kawei ka sur ba u Lat ka jylla un pdiang ia ka jingkyrpad ba tang ki riewlum kiba dei ki Garo kin ioh ban iakhun ia ka MDC elekshon ha GHADC.
U president jong ka GSU u la ai khublei ia ki para riewlum kiba la ai ka jingkyrshan ha kane ka jingialeh ban pynioh ia ka hok ka jong ki ha kaba ia dei bad ka jingjied ia ki MDC, ka jingkhublei ka leit sha ki seng bhalang bad ki paidbah Khasi bad Jaintia kiba la pynpaw bad ai ia ka jingkyrshan ia ki kum ka jaitbynriew ha kane ka jingialeh.
