Shillong, Lber 06: Ka Garo Student’s Union (GSU) mynta ka sngi 6 tarik Lber kala khot ia ka jing bym iatrei lang bad ka sorkar kaba ki khot ha ka ktien nongwei ‘Non Cooperation Movement’ ban dawa na ka sorkar ba ka dei ban pdiang ia ka rai ka Garo Hills Autonomous District Council (GHADC) ba ki ban ia khun ia ka MDC elekshon ki dei ban suh lang ia ka syrnot Schedule Tribe.
U President jong ka GSU u samla Tengsak G.Momin haba ia kren ba u SP News Agency u la iathuh ba kane ka jingkhot ia ka NCM kala trei kam ha baroh ka ri lum Garo lait noh tang katto katne ki bynta shaphang sepngi jong ka Garo Hills ha kaba ki briew ki plie ia ki dukan jong ki.
Ka seng ka ai ka jingkyrshan ia ka rai jong ka GHADC ba ki ban iakhun ia ka MDC elekshon ki dei ban suh lang ia ka syrnot Schedule Tribe ha ka por ba ki thep kyrteng ban iakhun ia ka MDC elekshon sha ka iing dorbar ka GHADC.
Kane ka NCM kaba ki khot mynta ka sngi ka dei namar ba ka sorkar haduh mynta kam shym la leh eiei ia kaei kaba ka GHADC kala leh, ban pyntreikam ia kaei kaba la rai da ka GHADC ka sorkar ka dei ban phah sha u Lat ka jylla ban ioh ia ka jingmynjur bad ban pynmih ha ka jingpynbna sorkar ka Gazette ia kaba ka sorkar haduh mynta ka dang sngap jar jar.
