Shillong, Lber 29: Ban pynneh pynsah ia ki riti dustur bad iaka Kolshor kiba hap hapoh ka Raid Nongpoh haka 28/Lber/2026 ka Raid Nongpoh kala pynlong daka jingshad Sajer kaba la pynlong halor jong u Lum Wortoh ha Nongpoh Ri Bhoi District.
Ha katei ka sngi wat lada u pynthut u slap ruh hynrei ki paidbah na kylleng ki jaka kila wan ban tuid ban sakhi iaka jingshad Sajer kaba la pynlong daka Raid Nongpoh haka jingialam jong u Longdoh Raid u bah Linus Lyngdoh.
Ha katei ka sngi la don ka jingshad tynrah naki Raid ki bapher bapher kiba kynthup kum ka shad Shut wait naka Raid Nongpoh, ka jingshad na ka Raid Umwang, Raid Nonglyngdoh, Raid Nongtluh bad ka jingshad Rah Kynthei naka Raid Nongpoh.
Ha kane ka sngi la don lang u MLA ka Nongpoh ubah Mayralborn Syiem kum u Kongsan ha katei ka Shad Sajer, kiwei kiba la don lang ki long u bah Donlang Sohklet u ba dei u Co Chairman ka MREGC jong ka Sorkar Jylla kum u Symbud Kongsan ryngkat ka jingdon lang ki longsan mansan na ki Raid bapher bapher lem bad ki nongialam Seng Bhalang.
