Shillong, Rymphang 25: U Myntri ba dei peit ia ki kam pynroi nongkyndong u bah Sosthenes Sohtun haba jubad ia ka jingkylli ba la wanrah da u bah H.S. Kharpran la iathuh ba ki kynhun Self Help Group kiba hap hapoh National Rural Livelihood Mission (NRLM) ha East Khasi Hills ki don7088 tylli.
Haba jubab ia ka jingkylli bynrap la iathuh ba ka rukom trei kam jong ki SHG ki iapher na kawei ka kynhun sha kawei ka kynhun hynrei baroh ki SHG kiba don mynta ki trei kam bha, ka jingiapher ka long ba don kiba trei khambha don pat ki iatrei tang para dkhot.
U Myntri Rangbah ka jylla u Conrad K. Sangma haba iarap ban jubab ia ki jingkylli bynrap na ki dkhot ka iing dorbar u la ong ban thaw ia ka SHG donkam ban don10 ngut ne haduh 15 ngut ki para kynthei, kaei kaba ki donkam ban leh ka long ba kin thoh ia ka rai ba la shna ia ka SHG kim donkam ban register hynrei da katei ka rai ki la lah ban leit sha bank ban plie ia ka akkount.
Haba ki la lah ban plie ia ka akkount ka sorkar ka ai ia ka jingiarap kaba shisien ka pisa ba kin sdang trei kam, hadien kata ka sorkar ka ai ia ka pisa ba kin sdang ban pyntyllun ia ka kam bad ia ka pisa na ka bynta jong ki kum ka kynhun. Kine ki SHG haba ki pyni ia ka jingtrei kam jong ki ban pynheh ia ka kam ki lah ban shim ram na bank khlem da buh bynda haduh T.10,00,000/-.
La iathuh hapoh ka iing dorbar ba haduh mynta ki la don 53 hajar tylli ki SHG ha ka jylla baroh kawei bad ka jingdon ki dkhot ka la kot sha ka 5,80,000 ngut bad haduh mynta ka pisa kaba ka sorkar ka la iarap ka long T.49/- klur bad ka ram kaba ki la shim ka kot sha ka T.1100/- klur na kane ka ram kaba ki lah shim ka jingsiew ka la kot sha ka 95% bad ka long tang kumba 5% eiei kiba khlem trei kam bha.
U Myntri Rangbah u la jubab ba kine ki SHG kiba don mynta katkum ki kyndon ba la buh da ka sorkar pdeng NRLM ka dei tang na ka bynta ki kynthei hynrei ka la don ruh ka jingiakren na ka bynta ki shynrang ruh ia kaba ka sorkar ka dang shong pyrkhat.
