Shillong, Nailar 03: Da ka jingthmu ban pynsted ia ka kam u Bah Sanbor Shullai MLA ka South Shillong, ha ka sngi Saitjian u la leit ban jurip kynsan kynsan khlem da pyntip ban tip ia ka jingiaid shaphrang jong ka kam, ha kaba iadei bad ka surok ba shna thymmai najan ka khyrdop ka Assembly ka ban mih sha surok bah ha Umshyrphi.
Ia u Bah Sanbor Shullai la synran lang da ki Rangbah Shnong bad ki nongkitkam shnong jong ki phra tylli ki dorbar shnong kiba hap hapoh ka Raid Laban, ha ryngkat bad ki ophisar na ka tnad PWD nalor kiwei pat.
Ia ka jingjurip la sdng najan ka khyrdop jong ka Assembly kaba don ha Rilbong bad iaid ter ter shaduh shajan jong ka quarter ki pulit CID kaba don sha lyndet jong ka Assembly, bad la sakhi ba ia ka kam kala iaid shaid shaid bad ka jingsdang ban pynheh ia ka surok kala sdang bad lada ai lad bha ka mariang kane ka jingshna surok thymmai kan ym shim por shuh.
Hadien jong kane, na ka liang u Bah Sanbor u la jurip sa ia kawei ka surok kaba don hajan ka ophis jong u Shillong Times bad iaid ter ter shaduh shapoh ka ban mih mih sha surok bah jong ka Umshyrphi.
Haba kren bad ki lad pathai khubor u Bah Shullai u la pyntip ba ia kane ka surok la mang ha ka jinglut kaba kot haduh 6 klur tam bad la khmih lynti ba ia kane ka surok ba dang sha mynta, yn lah ban pyndep ha u bnai Kyllalyngkot jong u snem 2026.
U Bah Sanbor u la ai khublei ruh ia ka sorkar MDA I bad kumjuh ruh ia kane ka sorkar ba mynta ka MDA II ha kaba la ia kren ban ioh jaka na ka tnad Arts and Culture ban pynioh surok ban ia kynduh bad ka surok bah ha Umshyrphi.
U Bah Sanbor u la pynpaw ba ka thain Laban ka don ki jaka rung bad jaka mih tang ar tylli kawei na Civil Hospital bad kawei na Rhino bad kane ka surok kan iarap shibun eh ia ki paidbah nong shong shnong ka Raid Laban ynda la dep shna ia ka.
