Shillong, Lber 9: Mynta ka sngi ka North Eastern Council kala pynmih ia ka khubor ba kan bei pisa ban shna ia ka jingkieng iaid kali da ka dewbilat ka ban pynsuk ia ka leit ka wan ki nongshong shnong na Khaddum sha Brichyrnot bad kumjuh ia ka shnong Hmar kaba hap ha East Jaintia Hills.
Ka Meghalaya ka dei kawei na ki jylla kaba ioh ia ka mang tyngka ban kyrshan ia ki skhim bapher bapher ban pyntrei na ka bynta ka jingmyntoi ki paidbah ha kane ka jylla lyngba ka jingbei pisa ka NEC.
Ka NEC ka la pynbna ruh kan bei tyngka ban shna ia ka Cultural Complex ka Seng Khasi Ri Raid Laban ha Lum Shat Sngi, Kenches Trace, Shillong, bad kane kan long ka jaka ban pynneh pynsan ia ki riti dustur bad ban kyntiew ia kaei kaba la ioh pateng na u longshuwa manshuwa.
Kine ki synjam kiba ka NEC kala shim ka long ban shna ia ki jingtei ban pynneh pynsah ia ka thymmei tynrai bad ha kajuh ka por ban plie ka lad ka lynti ban kyntiew ia ka ioh ka kot jong ki trai shnong bad ka NEC kan nang iai bteng ban kyntiew ia ki riti dustur kane ka thain shatei lammihngi ka Ri India.
