Shillong, Jylliew 22: Ki khatar seng kiba kynthup ia ka HYC, SSSS, HANM, RBSU,CORP, WYF,WKSU,JYF, JSU,AJSU, EJNC bad MPUF ka pynpaw ia ka jingsngew bitar halor ka jingtip lyngba ki khubor ba lah mih ba ki bor pulit jong ka Jylla ki thmu ban dang kem shuh shuh ia ki kiba don bynta ha ka jingia mih paidbah ka jong ki ha kine ki sngi ba lahdep ban pynpaw ka jingpyrshah ia ka jingshah ktah kti ki khynnah Khasi ha Them Metor bad kumjuh ruh ban dawa na ka Sorkar ba kadei ban pynkynriah noh ia kine ki briew na kane ka jaka kaba dei ka jingdawa jong ka Jaidbynriew Hynniewtrep hi kaba lah sahteng mynta da ki phew tylli ki snem.
Kane ka jingmih ki paidbah ha Surok ha kito ki sngi ban pynpaw ia ka jingsngew ka jong ki kadei halor ka jingsngew sohsat halor kane ka mat ha kaba ki Sorkar kiba lah leit ki lah shu pynsah teng ia kane ka kam tad haduh kane ka khyllipmat bad pynpaw sha ka Sorkar kaba mynta ba kadei ban leh ei ei ban weng noh ia kine ki nongbuhai shnong beain ha Them Metor Iew Mawlong.
Ngim lah ban len ba ha kane ka jingiakhih bun kiba shah kem bad mynsaw bad duh ruh ia ki dkhot met ki jong ki ki dei ki paradoh parasnam ki jong ngi bad na ka liang ki kynhun bapher bapher da kawei ka sur lah mih ka jingdawa ba dei ban weng noh ia kine ki briew na Them Metor bad kumjuh ruh ba ka Sorkar kan pyllait noh ia kine shah kem khnang ba ka jingsuk kan wan biang ha kane ka Nongbah ka jong ngi.
Ka Sorkar lyngba ki jingiakren bad iakynduh ka lah pyntip ba kan leh ia kaba donkam ban pynkynriah ia kine ki briew. Dei halor kata ka Nongrim ba ki paidbah ki lah ia sangeh noh ka jingiakhih ka jong ki bad kumta ka jingshongsuk ka la wan biang ha kane ka Nongbah bad ki paidbah ka Jaidbynriew Hynniewtrep ia mynta ki dang ap ia ka jingkular jong kane ka Sorkar ban pyndep.
Hynrei kane ka jingmih khubor ba ki bor Pulit kin dang bteng ia ka jingkem ia ki paidbah kan long pynban ka jingai ding ba ki paidbah kin ia mih biang sa shisien sha surok ban ia pynibor bad ki bor ka ain bad kane kan ialam sha ka jingeh kaba khraw ia ka Sorkar.
Na ka liang ka kynhun ka kyntu ia ki Pulit ba kin sangeh noh shi syndon ia kane ka jingthmu ka jong ki khnang ba kan nym ktah ia ka shong suk shongsain ha kane ka Nongbah bad ha ka Bri u Hynniewtrep hi baroh kawei lada ki Pulit bad ka Sorkar ki kwah ban pynneh ia ka shong suk shongsain kumba ka long mynta.
Ka kynhun ka pynrem ruh ia ki jingkren jong ki kynhun ka Jaidbynriew Sikh ki bapher bapher kiba wan na shabar ban tuklar ia ka kam ing jong ka Jylla ka jong ngi bad ruh kiba wan ban bet ia u symbai ka jingsngew iapher jaidbynriew lyngba kane ka Mat khlem da tip bad sngewthuh ia ka tharai jong kane ka kam. Ngi kyntu ia ka Sorkar ba kan nym sngap ia ki jingkren jong kine ki kynhun bad ruh ba kin pynstet ia kane ka kam katba lah.
