Shillong, Rymphang 03: Myntaka sngi ki nongthoh khubor na ka jylla Katnataka kiba la wan sha kane ka jylla lyngba ka Press Information Bureau ka sorkar pdeng kila ia kynduh ia u bah Strong Pillar Kharjana shongknor ka iing dorbar jong ka KHADC ban sngewthuh ia ka jingtrei kam ka synshar tynrai.
Ha kane ka jingiakynduh la batai ia ka rukom trei kam jong ka Autonomous District Council bad ka bynta kaba kongsan ka long ban pynneh pynsah ia ka riti dustur katkum ka Sixth Schedule ka riti synshar ka ri India ban pynneh pynsah ia ka jinglong tynrai ki jaidbynriew khasi bad ha ka juh ka por ka jingpyntrei ia ki kam pynroi.
Ha kane ka jingiakynduh na ka liang jong ki MDC kila batai ia ka jingtreikam ki khlieh nongsynshar,ka jingpyniaid ia ki hima sima, ka jingpyntrei kam ia ki ain tynrai, ka khyndew ka shyiap bad kaba kongsan ka long haba ki shim ia ka rai ki shim da ka jingiamynjur lang ha ka shynshar ha ki shnong ki thaw.
Ha kane ka jingiakynduh na ka liang jong ki nongthoh khubor kila buh ia ki jingkylli ia ka jingtreikam jong ka KHADC bad kane ka jingiakynduh kala ai jingshia ia ka synshar khadar kaba kyrpang ha kane ka jylla Meghalaya kaba la bud ryntih pateng pateng.
Ha kane jingiakynduh la donlang u bah Powell Sohkhlet, Executive Member, Information Technology, u bah Seibor Warbah, Executive Member, Finance, u bah Denzil Chen, Executive Member, Elaka, ka kong Deiti Majaw, Executive Member, Law) bad u bah D.G. Syiemiong, Secretary, Executive Committee.
