Shillong, Lber 30: U myntri rangbah ka jylla u Conrad K Sangma ula pynpaw iaka jingsngewnguh ia u myntri rangbahduh ka Ri India u Narendra Modi bala shim iaka rai ban pyntreikam iaka skhim Hills Pride ban kyntiew ia ki jylla riewlum kiba la shah ktah ha ka jingai jingmut ka Sixteen Finance Commission haba iadei bad ka jingbei pisa sha ki jylla.
Haba ia kren ha ka jingialang paidbah mynta ka sngi 30/Lber/2026 ha Umsning Ri Bhoi District ban buh ia u maw nongrim ba iadei bad ka skhim “Ri Bhoi Silk Dream E-Rise” u myntri rangbah ula ong ba ka thong jong ka sorkar ka long ban pynpoi iaki kam pynroi sha ki paidbah.
Kane ka skhim ka long ban wanrah ia ki buit thymmai kumno ban thir ksai ha kaba iadei bad ka thain jain ha Ri Bhoi District ula ong ba ia kane ula iakren bad ki paidbah ka Umsning ha u Naiwieng 2025 bad mynta la lah ban buh ia u maw nongrim ban sdang pyntrei ia ka skhim.
U myntri rangbah ula ong ba na ka daw jong ka jingbym biang ka rukom ai bam, ka jingbym biang jaka ri iaki khniang ka jingpynmih ia u ksai ryndia ka long kaba duna, bad ia u ksai la wan thied tad dor da ki briew na Assam tang hapdeng 700 haduh 800 tyngka shi kilo.
Ki jingwan rah ia kane ka skhim ka long ban ai jingmyntoi ia ki 7000 ngut kiba ri ia u khniang ryndia bad ka jingiarap ka sorkar ha ka bynta kaba nyngkong kan long 1200 ngut na ki 22 tylli ki jaka ri khniang kiba don ha baroh 5 tylli ki block bad ka jingiarap kan long 30000 tyngka na ka bynta uwei pa uwei u nongri khniang, ka jinglut ia kane ka skhim kan long 4.61 klur hynrei ka jingmih kane ka kam ri khniang na kane ka skhim ha ka shi snem kan kot sha ka 10 klur tyngka.
Ha kane ka sngi u myntri rangbah ula sam ruh iaki jingiarap sha ki paidbah ha ka jingiadonlang u myntri pynroi nongkyndong u bah Sosthenes Sohtun, u MLA kane ka jaka u Dr C Lyngdoh, u MLA ka Nongpoh u bah Meyrelborn Syiem lem bad ki heh sorkar kila ia donlang.
