Shillong Nohprah 17: Ki nonghikai SAA hapoh jong ka lama All Meghalaya SSA School Teacher’s Association (AMSSASTA) mynta ka sngi kila pynlong ia ka jingiakhih ban dawa ia ka tulop jong ki kaba ki khlem pat ioh mynta la san bnai lynter, ia kane ka jingiakhih la pynlong ha ki ar jaka ha Shillong bad ha Tura.
U Bah Lastforuse Marngar president jong ka AMSSASTA haba kren ha ki lat pathai khubor ha Madan Student’s Jaiaw ka jaka ba ki la pynlong ia kane ka jingiakhih shong kyllain mungor u la ong ba ki nonghikai SSA kiba don palat ia ka 12000 ngut ha ka jylla baroh kawei ki khlem ioh ia ka tulop jong ki mynta la san bnai.
Kum ka seng kala dep ban ai ia ka dorkhas sha u myntri rangbah ka jylla ha kaba ia dei bad kane ka jingbym ioh tulop jong ki hynrei haduh mynta kim pat ioh jingtip ei ei ba la pynlait ia ka pisa kaba dei ka tulop jong ki nonghikai SSA. Kane ka jingbym ioh tulop kala buh ia ki ha ka jingeh kaba khraw.
Ki nonghikai SSA ha Garo Hills kila pynlong ia kane ka juh ka jingiakhih jong ki mynta ka sngi ha Tura, namar ka jingdon kane ka khlam COVID-19 kim shym la lah ban pynlong tang shi jaka hynrei kila hap ban pynlong ha ki ar tylli ki jaka bad ki dawa na ka sorkar ba kan pynlait noh ia ka tulop jong ki shuwa kane ka leh kmen Khristmas.
Ki nonghikai SSA kiba don ha ka lama jong ka AMSSASTA kila ia wan na kylleng ki bynta ki rilum khasi mynta ka sngi ban ia shim bynta ha kane ka jingiakhih ban dawa na ka sorkar pdeng bad ka sorkar jylla ba kin sngewbha ban pynlait noh ia ka tulop jong ki nonghikai bad kum juh ia ka arear kaba la sah mynta la phra bnai.
Kiwei kiba la kren ha kane ka jingiakhih shongkyllain mungor ki long u Working President u bah Peter Thyrniang, u bah Defender Lamare secretary ka seng kine baroh ar ngut kila pynpaw ia ka jingeh kaba ki nonghikai kila ia kynduh na ka daw jong ka jingbym ioh ia ka tulop mynta la san bnai.
Kitei ki nongialam baroh lai ngut kila dawa ba ka sorkar ka dei ban iathuh noh ia ki nonghikai SSA kum ki nonghikai ba pura jong ka sorkar jylla, kaba sngew tynnad ba ka jingiakren ban ia tylli ki ar tylli ki seng jong ki nonghikai SSA kila ia kren ban long noh tang kawei.
