Mawshuit, Kyllalyngkot 06: Mytna ka sngi ka 6 Tarik Kyllalyngkot 2026, katkum ka riti ka dustur ka Hima Sohra, bai a u Syiem bala shah jied yn nym lah ban shimti ia ka khet kum u syiem ba pura khlem da pyndep ia ka duwai ha phirat bad ka pynsleh pynsopng na ka Raid Mawshuit khatar shnong.
Mynta ka sngi ka Raid Mawshuit kala pyndep ia ka duwai ka phirat ha shnong Nongbah bad ia kane ka jingduwai ka phirat la pyndep da u bah Brun Khongshei u rangbah ba dei u nognshat nongkhien ha Raid Mawshuit, ha ka jingdon lang ki tynmen ki san, ka Syiem Sad ka Kastilimai Syiem bad u Syiem bala shah jied u Maremdor Syiem.
Ha dien bala dep ka duwai ka phirat la wan ia lam ia u Syiem ka hima ha khmat ki paidbah bad la pynsleh da ka umphniang namar la dep ban pyndep ia ka duwai ka phirat bad mynta la long u syiem ba pura ka hima, ia ka jingpynsleh umphniang kum ka dak ba u la dei u syiem ba pura ka hima ia u Maremdor la pynslem da u sordar ka Raid Mawshuit u bah Jling Shrieh bad ia ka spong la pynspong da u bah Semi Khongshei.
Haba la dep baroh ki jingleh katkum ka riti ka dustur ka hima Sohra, la pynlong ia ka jing kren na ki riew rangbah, kyntup ia u Secretary ka Hima Sohra u bah V B Rymmai u bala kren ia ka history lyngkot ha Hima Sohra ba kumno la phiah ia ka Hima Sohra.
Ka jingkren ka Syiemsad ka kong Kastilimai Syiem kala kren ia ka kam hima sima katkum ki riti ki dustur kaba la hima kala bud bad kala kyntu ban ai ia ki khubor kiba shisha ban nym ialam bakla ia ki paidbah.
La kren ruh da u Syiem bala pynskhem ha kane ka duwai ka phirat kabala pyndep mynta ka sngi ha Raid Mawshuit ha shnongbah ha kaba u la ai ka kular ban ai ka jingsynshar kaba khuid kaba suba bad un kloi ban sngap ia ka jingud jingnam jong ki khun kihajar.
Ha kane ka sngi la ioh ruh ia ka jingkren na u myntri Nongrum, kiwei kiwei ki riew rangbah na ka raid Mawshuit, kaba hap ha Khatar shnong, kane ka thianka don 12 sordar hynrei kiba la wan mynta ka sngi kalong na ki khatwei sordar namar ka Raid Mangmang ka khlem wan ia shim bynta.
