Shillong, Nailur 22: Ka seng Khasi Women Welfare and Development Association(KWWADA) bad ka Civil Society Women Organization,(CSWO) ha ka jingialang kaba la long mynta ka sngi ki la shim ia ka rai ban leit tur sha Additional Secretariat ban pynlong ia ka jinhgiakhih shong kyllain mungor ha ka jaka ieng kali ha ka 25 tarik mynta u bnai.
Ia kane ka rai la shim mynta ka sngi ha ka jingialang kaba la long ha iing jong ka president jong ka CSWO. Kane ka long ban pynbor ia ka sorkar ba ka dei ban pyntrei kam noh ia ka ILP kumba la ai jingmud da ka HLC kaba la thaw hi da ka sorkar.
Ia kane ka jingleit ban shong kyllain mungor ha katei ka jaka yn lam khmat da ka kong Agnes Kharshiing president jong ka CSWO bad ka kong Nehi Rapthap president jong ka KWWADA. Na ka liang jong kitei ki ar tylli ki seng ki khot ki wer ia ki paidbah ba kin ia shnoh kti lang ha ka jingiakhih ban dawa na kane ka sorkar ba ka dei ban pyntrei kam ia ki jingdawa jong ki paidbah.
Kane ka jingiakhih da kaba shong kyllain mungor ka long ban pyrshah ia ka jingleh thlumur jong ka sorkar ha ki jingtrei kam ki jong ka ha kiba bun ki liang, ha kaba shim ia ki jaka jong ki riewlum, ka jingbym ioh kam jong ki samla kiba la pass ia ki exsamin ka jong ki bad ka sorkar ka dei ban pyntrei kam noh ia ka ILP ha kane ka jylla ban iada ia ki rit paid. La kynnoh ba kane ka dei ka sorkar synshar donbor.
Ha kane ka jingleit ban shong kyllain mungor ha jaka ieng kali ha jan Add Secretarait ka long ban pynpaw pyrshah ia ka synshar lehbor jong kane ka sorkar kaba mynta, ha kaba kam don por shuh ban peit ia ka jingkiewdor jong ki marbam mardih kaba la ktah lut ia ki luk ki lak jong ka jylla
Ka Riti synshar jong ka Ri India ka article kaba 19(10) ka la kren shai ba baroh ki nongshong shnong jong ka Ri ki don ia ka hok ban ia lum paidbah ban iakhih da kaba jai jia. Kine ki seng ki la shim ia ka rai ba kin pynlong ia kane ka jingiakhih kaba jai jia ha ka 25 tarik mynta u bnai.(SP News)
