Shillong, Rymphang 28: Ka Khasi Student Union Bakur, Dawki kala phah da ka jingthoh sha u District Medical Health Officer jong ka West Jaintia Health District ba ha Dawki PHC mynta la artaiew ym don doktor namar ba ia u doktor ba don la pynkynriah noh na katei ka jaka ai jingsumar.
Haba ki dkhot jong ka seng kila ia kren bad ki bor ba iadei peit la sngewthuh ba yn nang phah doktor thymmai da uwei pat ha kaba shen yn sa pynmih ia ka jingbna sorkar hynrei mynta la palat shibnai ym shim don kano kano ka dak ka shin ban don doktor bad kane kala buh ia ki paidbah ha katei ka thain ha ka jingeh.
Na ka liang ka KSU kala phah ia kane ka jingthoh sha u DMHO ka West Jaintia Hills ha ka 27 tarik Rymphang 2026 ban kyntu ia katei ka ophis ba kan pynkloi noh ban phah doktor sha PHC Dawki, ia kane ka juh ka shithi kala phah sha u myntri ka tnad ka koit ka khiah u bah Wailadmiki Shylla na ka bynta ka jingtip jong u.
