Shillong, Nohprah 24: Mynta ka sngi ka 24 tarik u Nohprah 2025, Ka KSU Raid Nongtung Circle hadien ka jingud bad pyni jingeh ki paidbah nongshong ka shnong Umsaw Lum Dorbar kaba don sha ki thaiñ khappud bad ka Assam ka la pyntih bad pynbha ia ka surok ha katei ka shnong da kaba phah ha ryngkat ka JCB. kum ka jing ai sngewbha ban lehkmen khristmas.
Kumban shu pynkynmaw kane ka shnong ka dei ka jaka ba ki paradoh parasnam jong ngi ki shah thombor ki 30 tylli ki longiing kila shah thang ha ka tnat Forest Assam ha u Snem 2005 bad ha kaba ki Nongialam hapoh ka jingialam u Bah Samuel B.Jyrwa (President KSU Sengkmie ha kato ka por), Bah Hamlet Dohling-General Sect barim ha ryngkat u Maieid Hopingstone Lyngdoh ki la leit mardor ban leit khmih, ban leit ai jingiarap bad iada ia ki paradoh parasnam ha katei ka shnong bad ki la pynshim wai da kawei ka jaka ban sher dara shipor na ka bynta kitei ki longiing.
Katei ka jingleit pyntih da ka KSU Raid Nongtung Circle ka dei ruh hadien ba ki Nongshong shnong ka tei ka shnong ka la ud bad pynsngew sha I Bah Samuel B.Jyrwa ( Chairman NESO) mynha ka 16 tarik ha ka jingleit jngoh jong I ia ka tei ka shnong.
