Shillong, Lber 27: U nongialam ka liang pyrshah ha Khasi Hills Autonomous District Council uba dei ruh u MDC ka Sohra u Bah Titos W Chyne, ha ka sngi ba-ar jong ka dorbar mang tyngka u la pynpaw ba ka liang pyrshah kam pat da kwah eh ban wanrah ia ki mation ban iatai hapoh ka dorbar, hynrei namar ba u shongknor u khlem khot lang ban ia pyrkat halor ka sien shong dorbar kim banse ban wanrah tang ban lait thylli ka private member resolution bad motion.
Ia kane u Bah Titos u la pynpaw haba wanrah ia ka motion hapoh ka iing dorbar halor ka jingeh jong ki briew kiba la ia kynduh na ka jingshah khang ka kam tih maw bad tih shyiap hapoh u pud u sam jong ka KHADC.
Ha ka jingshisha u shongknor u ju khot lang ia u CEM bad ia u nongialam ka liang pyrshah ban ia pyrkhat halor ka sien shong dorbar kumba ju long hapoh Assembly kaba don ia ka Business Advisory Committee (BAC) bad u la pynpaw ruh ba jin lada u shongknor u khot lang kane ka dorbar mang tyngka ka lah ban long tang ar sngi.
Haba wanrah ia kane ka motion u Bah Titos u la ong ba ki paidbah ka thain Nongkrem, Mawkynrew, Langkyrdem bad kiwei de ki shem jingeh bha hadien ba ka sorkar kmie kala pyntrei kam ia ka ain bad kane ka wanrah jingeh ba kraw ia ki paidbah kiba im kamai ja kpoh na kane ka kam.
Shuh shuh u la ong ba ha ka por ba u long CEM ha Council u la dep ban ai jingmut sha ka sorkar jylla ban don noh da ka traditional mining, hynrei haduh mynta kam shym pat la urlong satia bad bynrap ruh ba hadien ka sorkar kala thaw ia ka committee dei ban kynthup ia ka Council ka EC kadei ban leh ban weng ia kane ka jingeh.
Haba jubab halor kane u CEM u Bah Shemborlang Rynjah u la ong ba ka long shisha ka ka mat ba kongsan ban iatai wat lada ka council kam ia don bynta ban thaw ain bad bynrap ruh ba ka council ka donkam ban ai tang ka NoC.
Shuh shuh u CEM u la ong, Ban kren halor ki lad ki lynti ka Council ka donkam ban buddien ia ka jingai jingmut halor ka traditional mining bad ka council ka donkam ban shim khia bha ia kane ban krem bad ban lei tai jingmut sha ka sorkar bad bynrap ruh “Ka EC kan thaw ia ki lad ki lynti ban wanrah da ka ain ban pynsuk ia ki briew kiba im ja kpoh na ka kam tih maw tih shyiap hynrei ym dei pat ban pynjot ia ka mariang.
