Shillong, Iaiong 22: Hadien ka jingleit ban tur kynsan kynsan jong ka Hyniewtrep Youth Council kaba la pynshong syier ia ki nongtrei, ki bor ba dei peit jong ka North Eastern Indira Gandhi Regional Institute of Health and Medical Science (NEIGRIHMS) kila pan bor pahara CAPF na u Joint Secretary (H-III) Ministry of Health and Family Welfare.
Kane ka jingpan bor pahara da ka NEIGRIHMS kadei lyngba u Deputy Director u Pawan Deep u la phah jingthoh sha u Joint Secretary (H-III) Ministry of Health and Family Welfare.
Kane ka jingpan bor pahara da ki bor pyniaid jong ka NEIGRIHMS, kadei hadien ka jingleit ban tur kynsan jong ki dkhot ka HYC da ka jingthmu ban khang tala ia ka ophis trei kam u Director, hadien ka jingmynthi ia ka rukom thung kam nurse ba 80 percent ia ki kynthei bad 20 percent ia ki Shynrang.
Katkum ka shithi ba la phah sha u Joint Secretary jong ka Ministry of Health and Family Welfare u Deputy Director ka NEIGRIHMS u Pawan Deep u la pyntip ba kane ka jaka ai jingsumar kala ioh pdiang ia ka shithi halor ka jingthung kam nurse halor ka 80 la 20 (Kynthei bad Shynrang) na ar tylli ki seng ba kynthup ia ka Hynniewtrep Youth Council bad ka Khasi Student Union’s.
Halor kane, ban pyntikna ia ka jingiaid beit iaid ryntih jong kane ka jaka ai jingsumar la donkam kyrkieh ban pynkhlain ia ki bor pahara bad la donkam ban don noh da ki bor pahara jong ka CAPF ha kane ka jaka ai jingsumar.
