Shillong, Jylliew 17: Halor ka jingkhlad ka longkmie armet na Jalaphet Sutnga, ha MCH Hospital Jowai, ka Myntri ka tnad ka koit ka khiah ka Sorkar jylla, ka Kong M Ampareen Lyngdoh, kala ong ba ka tnad kan dang ap ia ka kaiphot ka jingtohkit halor kane ka mat.
ban shu kdew hangne ka Kong Pynchie Bareh bad i khun ba ka dang pun ki la khlad noh ha MCH Hospital Jowai, ha ka 5 tarik Jylliew 2025, na ka jingpait ka pla khun, ki ba ha ing ki la kynnoh ba kane ka jia na ka jingslem ki nongsumar kane ka hospital ban ai ka jingsumar ia kane ka longkmie.
Haba kren sha ki nongthoh khubor ka Kong Ampareen ka la ong, ka jingjia ba khlad ka longkmie na Jalaphet, kiba ha ing ki la dep ban ujor sha ka ingkashari bad nalor kane ka Human Right Commission jong ka jylla ka la dep ban pan ia ka kaiphot halor kane ka jingjia.
Ka kthang ka mynsiem halor kane ka jingjia hynrei ngin hap ban peit ba kum ka Jylla kum kine ki jait jingjia kim dei ban jia, mano ba bakla haei ki bakla ngam kwah ban kynnoh hangne hynrei ia kine baroh hap ban iatai halor ki rynsan kiba dei ban iatai” ka la bynrap.
Ka kong Ampareen Halor kane ka jingjia ka la ong kin sa peit kumno kan wan ka jingbishar bad lada lap ba don kano kano ka jingbakla ha kato ka sngi, bad kin ap ia ka kaiphot, nalade ngi tip ba lada don ka jingbakla kin hap ban bah khlieh, hynrei ia kaba mynta ngin ap ia ka kaiphot.
