New Delhi, Naiwieng 26: U President jong ka Ri India u Ram Nath Kovind mynta ka sngi u la iashim bynta sngi u la ia shim bynta ha ka jingrakhe ia ka jingdap 70 snem ka Riti Synshar jong ka Ri India ia kaba la pynlong da ki nongmih khmat ha dorbar parliament hapoh jong ka Central Hall.
Haba kren ha kane jingialang u la ong ba ka Riti Synshar jong ka Ri ka dei ka thymmai bah jong ka synshar paidbah kaba heh duh ha ka pyrthei, ka dei ruh ka ain kaba ha khleihduh jong ka Ri bad ka Riti Synshar kaba btin lynti ha ka jingtrei kam. Ka Riti Synshar ka dei ka bor bah ha ka jingsynshar paidbah.
U President u la ong ba ha ka synshar paidbah ka don ka thymmei ha ka Riti Synshar ban pynthikna ba ka Riti Synshar ha ia hap ha baroh kip or bad ki nongthaw ia ka Riti Synshar kila buh lypa ia ki bynta ba ki pateng ban wan ki lah ban wanrah ia ka jingkylla katkum ka por.
Kane ka dei ka sngi ban ai khublei kyrpang ia ki nongsain dur ia ka Riti Synshar jong ka Ri kiba la lah ban wan rah ia ka jingkylla da kaba jai jai da kaba pynkylla ia ka Riti Synshar jong ka Ri. Ki paidbah jong ka Ri ki don ia ka hok ban burom ia ka Riti Synshar ia kaei kaba lah ban ioh ha kine ki 70 snem ba la leit noh.
Ki lai tylli ki bynta kiba kongsan la ka dei ia ka sorkar pdeng ne ia ki sorkar jylla, ka iing dorbar thawain, ka sorkar ba synshar bad ka iing Bishar ki ruh ki dei ban ia burom markylliang kane ka wanrah ruh ia ka jingiajan hapdeng ka sorkar pdeng bad ki sorkar jylla, ka jingiaid lynti sha ka jingiatreilang ka dei ka nongmuna na ka daw jong ka Riti synshar.
U President u la pynkymaw ia kaei kaba u kpa ka jaid bynriew u Mahatma Gandhi u kren halor ka bynta dei ban ioh bad ka kamram ba dei ban leh u la ong “ Ka hok ba shisha ba dei ban ioh ka dei ruh ha ka jingleh” lada baroh ki leh ia la ka jong ka kamram, ka hok ba dei ban ioh kam jngai, hynrei lada ym lah ban leh ia ka ka jong ka kamram hynrei ngi ia beh ia ka hok ban ioh kane kan phet jngai.
U President u la ong ba ka jingpynrung ia ki kamram ba dei ban leh ha ka Riti Synshar, ka dorbar bah jong ka Ri India ka Parliament kala kren shai kdar haba tip ia ka hok ba dei ban ioh, hap ban tip ruh ia ka hok ba dei ban leh na ka liang jong ki paidbah nongshong shnong ka Ri.
U president u la ban shuh shuh da kaba ong ba ka hok ba dei ban ioh bad ka hok ba dei ban leh ka long kum ka pisa ba don ar liang ki dur hynrei ka juh ka pisa, ka Riti Synshar kala ai ia ka jingialaitluid ban kren, ha ka juh ka por kala bthah ia ki paidbah ba kin sumar ia ki jingdon jingem jong ka sorkar bad kiar naki jingiaklumar. Kumta ka long ba don kam ban pyndep ia la ka kamram bad ha ka juh ka por dei ban pynthikna ban ioh ia ka jingiada ia ki hok ba dei ban ioh.
