Shillong, Jymmang 26: Ka Dorbar Shnong Wapungskur, East Jaiñtia Hills, ka la dawa na ka GR Infra Projects Ltd, ka contractor ba pyntrei ia u NH-6 ban maramot pynbha bad ruh ban trei dep ia ki bynta ba dang sahteng jong u surok National Highway – 6 u ba iaid lyngba jong ka shnong Wapungskur.
Ki nongialam jong ka Dorbar Shnong Wapungskur hapoh ka jingialam jong u Ma Deolangki Dkhar, kum u Waheh Shnong, dang ha kine ki khyndiat sngi ba la dep, ha ryngkat ka dorkhast, ki la leit ia kynduh ia ki bor jong ka GR Infra Projects Ltd.
Kontractor kaba pynshna ia u surok NH-6 tad haduh mynta, ban dawa na ka ban maramot pynbha ia ki bynta ba shlei um hapdeng surok, ban shna pyndep ia ki ki nala um (side drains) ba dangsah, ki lynti iaid kjat (footpaths), ki guard wall, ki traffic lights bad signals, lem bad ki rumble strips.
Kat kum ba long mynta, ki don bun ki bynta jong u NH-6 ba hap hapoh jong ka shnong Wapungskur kiba shait dap um smam hapdeng surok ha ka por lyuir bad ruh tuid um shapoh ki baranda iing briew bad sha ki jaka bym dei ban tuid um na ka daw jong ka jingbym biang bad set ki nala um kiba la dep shna jong utei ha katei ka surok.
Na ka daw jong ka jingbym shna pyndep lut ia baroh ki nala wat haduh mynta ruh wat la ia ka jingsiew bai luksan lah dep pyllait sha ki trai jaka naduh mynno re. Nalor kitei ki jingeh kiba ka shnong Wapungskur bad u paidbah ki ia kynduh ha ka jingiadei bad katei ka surok.
Ka shnong Wapungskur, ka la dawa ruh na ki bor ba dei peit ia u tei u surok ban shna ia ki rumble strips ha ki artylli ki jaka ba donkam bha, kata ha ka lad ban kam sha Step By Step Secondary School Wapung bad ruh sha K.B Memorial Secondary School Wapung, na bynta ka bha ka miat jong ki khynnah skul.
Ka shnong Wapungskur, ka la daw ruh na ki bor ba dei peit ia utei u surok ban maramot pynbha ia ki traffic lights kiba la shu pynieng sah kumto khlem trei kam shuh mynta; ban shna pyndep ia ki jaka iaid kjat bad ki guard wall na ka bynta ka jingshngaiñ jong ka iaid ka ieng jong u paidbah.
Ka Dorbar Shnong Wapungskur ka la dawa ruh na ka NHAI ban tuklar ia kane ka jingeh kaba u paidbah u ia kynduh na u NH-6 ba iaid lyngba ka shnong Wapungskur. Kane ka long kat kum ka kyrwoh ba la pyllait da u Ma Deolangki Dkhar, Waheh Shnong, Wapungskur.
