Shillong, Nailur 01: Ka seng FKJGP War Jaintia mynta ka sngi ha ka jingleit u Myntri ka tnad ka koit ka khiah u bah A.L Hek sha Amlarem Civil Sub Division ryngkat u myntri kam poh iing u bah Lahkmen Rymbui ba dei ruh MLA jong katei ka ja ka kila aisa da ka jingthoh ban dawa ba ia ka Padu State Dispensary ban pynkiew kyrdan sha ka PHC.
ka Seng FKJGP – War Jaintia Circle hapoh ka jinglamkhmat u bah Reachingson Kongwang, Gen Secretary bad u Bah Shlur Mukhim President ka Seng, ka la iakynduh markhmat bad ka kynhun ki ophisar sorkar lyngba ka jinglamkhmat u local MLA Ma Lahkmen Rymbui , ban pynsngew ia ka jingdawa ka seng naduh u snem 2012 ban kyntiew kyndan noh ia ka Padu State Dispensary sha ka Primary Health Centre.
Kane ka jingiohlad ka Seng ban iakynduh kadei ba mynta ka sngi, kine ki heh sorkar hapoh ka jingialam u local MLA ka thain, ki la hiar sha ka thain war Jaintia ban leit jurip ia ki hospital sorkar naduh ki PHC haduh ka CHC ban lah ban sngewthuh kumno ban wanrah ia ki jingbit jingbiang kine ki hospital na ka bynta ka jingmyntoi ia ki paitbah ka thain.
Kum ban shu pynkynmaw, la slem bha ba kane ka seng ka la dawa na ki bor sorkar ban shimkhia ia kane ka mat kaba kongsan ba ki paitbah ka thain ki iakynduh ha kaba iadei bad ka koit ka khia, bad la dep aiti ruh ia ka dorkhas sha ki bor sorkar naduh u snem 2012 ,Letter No : fkjgp/amc-51,dated: 19th.Sept.2012 bad na ka liang u Secretary jong ka tnat ka koit ka khiah ka sorkar jylla , u la thoh sha u Director of Health Services , letter no : Memo. No. Health. 119/2009/Pt.I/29-A, dated: 2nd . Aug. 2013 ban leh ia kaba donkam ha kaba iadei bad kane ka kam, hynrei haduh mynta mynne ka sorkar ka ka shu sngapjar ha ka kaba iadei bad kane ka kam. Kumta na ka liang, ka la buddien biang ia kane ka kam da kaba aiti biang ia ka shithie ban pynkynmaw ia ka sorkar halor kane ka bynta.
Ha kajuh ka por ka seng ka la lum ruh ia ka jingialang ryngkat bad u Doktor In-charge kane ka Dispensary ryngkat ka jingiadonlang ki Rangbah Shnong ,ki Secretary shnong bad kumjuh ruh ki riew rangbah ka thain ban iaphylliew jingmut halor kane ka kam bad la rai ruh ban iashong jingialang biang ha kane ka 5 tarik une u bnai.
