Shillong, Naiwieng 17: Ka KSU South West Khasi Hills District lyngba kane ka kyrwoh na u samla Forwardman Nongrem ( President KSU South West Khasi Hills District) ka la dawa naka sorkar Meghalaya ba ka dei ban wanrah noh iaka Community and Rural Development Block ha Wahkaji ne Umdohlun jongka South West Khasi Hills District.
Ka KSU South West Khasi Hills District ka la ban jur ba kane ka mat kam dei shuh kaba dang thymmai hynrei ka dei ka mat kaba ki paitbah ka thain bad ka seng ki la dawa la slem bah.
Ka jingai iaka C& RD Block ka dei ka ba donkam tam hapoh ka thain na ka bynta ki 44 tylli ki shnong jongka thain Phlangdiloin , Umdohlun bad Warsan Lyngdoh namar ki paitbah jong kine ki shnong ki don kiba hap mynta hapoh Mawkyrwat C&RD Block bad ki hap ban iaid kumba 30 haduh 50 kms ban poi sha Mawkyrwat bad ki hap ban shong kali haduh 3 kynta eiei .
Ki don pat ki shnong hapoh ka thain Phlangdiloin kiba hap hapoh ka Ranikor C&RD Block pat ki hap ban iaid kjat haduh 3 kynta ban poi sha Ranikor. Kine ki dei kiwei naki jingeh kiba ki paitbah jong kine ki thain ki iakynduh naduh ki por ba mynshwa haduh mynta bad kane ka la buh jingeh iaki bad ka la pynjynjar iaki shnong bad ki paitbah haba pyntrei iaki jingtrei 100 sngi ne MGNREGS bad ruh halor ki scheme ba hap hapoh ka National Social Assistance Programme bad kiwei kiwei ruh ki scheme ba hap ban leh naki ophis Block.
Ka seng naduh u snem 2015, 2016, 2017 ka la pynsngew ia kine ki mat sha ka sorkar bar ha u bnai February jong u snem 2022 ruh ngi la iakynduh ia u bah Hamletson Dohling uba dei u Minister i/c C&RD Department ban pynsngew ia kine ki jingeh.
Ka seng ka iai ban namar kata iaka sorkar ba ka dei ban phai khmat lem iaki paitbah jong kine ki dong ki thain da kaba ai noh daka C&RD Block namar kane ka dong ka thain ka dang dei kaba dang sah dien haduh mynta la ka long haka pule puthi bad ka roi ka par ruh kumjuh.
Ka KSU ka dawa ruh ba ki Nongmihmat jongka South West Khasi Hills District kata ia u bah Rinikton L. Tongkhar ( MLA Mawkyrwat uba dei ruh u Minister), ia u bah Carnes Sohshang ( MDC Mawkyrwat) bad kumjuh ruh ia u bah Pius Marwein ( MLA & MDC Ranikor ) ba ki dei ban kren eiei bad ki dei ban pynbor iaka sorkar ba kan shimkhia halor kane ka bynta.
Ka KSU ka kyntu ruh iaki nongialam shnong ba ki dei ban shimkhia halor kane ka mat ban pynsngew ia kane ka sur sha ka sorkar na ka bynta ka jingbit jingbiang jongki paitbah hapoh ka thain. Kane ka dei ka Kyrwoh na u samla Forwardman Nongrem President KSU South West Khasi Hills District.
