Shillong, Naitung 23: Ki Seng bhalang ka Ri-lum Garo kila dawa ba dei ban pynlong ia ka jingtohkit kaba bni
ah halor ka jingiap jong ka Diana Dimre Ch Marak, ka samla pule jong ka Shillong Polytechnic ha u bnai Jymmang 2024.
Ka seng ADE, FKJGP, GSU, AYWO bad ka FAF mynta ka sngi ka 23 tarik u Naitung 2024 kila ia ailang ia ka dorkhas sha ka Deputy Commissioner ka East Khasi Hills ka Kong R.M Kurbah ba kyrpad ba kan tuklar lem halor ka jingbym sngewhun ia ka rukom tohkit kumba la pynpaw da ki bahaiing bahasem jong katei ka samla kaba la khlad noh.
Ka Diana Dimre Ch Marak 24 snem ka rta, ka dang pule ia ka Diploma ha ka Civil Engineering ha Shillong Polytechnic bad ka dang pule ha ka 4th Semester. La lap ia ka met iap jongka ba ka la sahkut hapoh ka hostel jong ki khynnah kynthei jong katei ka jaka pule, ha ka jinglong jingman kaba ipher bha ha ka 6 tarik u Jymmang ha ka por kumba 3 baje mynstep.
Ha ka dorkhas ki bahaiing bahasem jong kane ka samla kaba la khlad noh kila kyrpad ban iakynduh ïa ngi bad haka jingïakynduh kila pynsngew ïa shibun kiei kiei sha ka jingtip jong ngi, kaba khlem iahap bad ka khana bad ka jinglong jingman ka rukom iap jong ka samla Diana. Ka jingïathuhkhana kaba mynta ka long ba ‘kadei ka jingjia jong ka jingpyniap ialade.
Ki la pynpaw ruh ba kum ki sengbhalang na ka rilum Garo, ngi kyrpad ia phi ba phin shim ia kane ka kam kum kaei kaei kaba don jingmut, namar kum kine ki jingjia la ju iohsngew mynshwa ha kajuh ka jaka pule bad kum kine ki jingjia ba sngewsih ym dei ban shim sting namar ka lah ban wanrah ia ka jingduh mynsiem kaba kham bun.
Ki la ong ruh ba ngi kwah ban pynshai ba ngim shym la thew ne kynnoh pyrshah ia uno uno u briew bad ngim shym la kynnoh ruh iano iano uba la leh ia kano kano ka kam runar.
Hynrei ngi ieng haka nongrim ba dei ban ai iaka hok sha katei samla kaba la khlad bad sha ki bahaiing bahasem jongka bad ka rukom treikam kadei dei ban iaid ha kata ka rukom ba ka jingtohkit kam dei ban don kano kano ka jingleh klet ne jingnoh shilliang.
Kumta ki la ujor da ka ejahar pyrshah ïa ka jingkynnoh ba ka Diana kala pynïap hi ïalade lyngba ka Zero FIR ha Tura Sadar PS ha ka 16 tarik u Jymmang. Shuh shuh kila phah ruh ïa ka shithi sha u SP, East Khasi Hills lyngba u Chairman ka Babupara Chambugong Mahari Association.
Da ka bao ng ba ka long ruh kaba donkam ban shimkhia ba ïa ka kaiphod jongka Post Mortem namar ym shym la aiti sha kiba haïing hasem jong katei ka nongïap haduh katto katne por, la palat ar taiew, watla ki bahaïing bahasem kila pan bunsien ïa ka kaiphod jongka PM bad watla ka kaiphod jong ka PM la pynkut ha ka sngi ba jia hi ha ka 6 tarik u Jymmang.
Hynrei tang ynda la thep ïa ka Zero FIR ha ka 16 tarik u Jymmang bad la thoh da ka shithi sha u SP ka East Khasi Hills ba ïa ka kaiphod jong ka PM la aiti sha ki bahaïing bahasem jong kaba la khlad noh.
Ki la pynpaw ruh ba ki kur kim sngewhun ïa ka ka kaiphod jongka Post moeterm namar u nongpeit bniah ia ka daw jong ka jingiap jong ka Diana ula pynkut ba kadei ka jingsdien phasi.
Ki nongialam seng ki ong ba u ophisar doktor uba la pynlong ia ka jingpeit bniah um shym la phah ia kino kino ki nuksa na ka bynta ka Histopathology bad ki nongialam ka Kur kila kam ba ka jingphah ia ki nuksa na ka bynta ka jingpang ka long kaba donkam na ka bynta kano kano ka kaiphod ba lah ban ngeit jong ka jingpeit bniah ia ka met iap bad ka kaiphod hadien ka jingiap, khamtam lada ka nongkhlad ka dei ka kynthei katkum ka ain.
Kila pynskhem shuh shuh ba dei ban tohkit bniah ia u Warden balei ba um don ha kata ka sngi kaba jia ka jingjia kaba sngewsih bad dei ruh ban tohkit ia u Director ka Shillong Polytechnic balei ba ym shym la don kano kano ka bor jongka jingkitkhlieh na katei ka jaka pule ha ka por ba aiti ia ka met iap sha ki bahaiing.
Kila pynpaw ba u Director ym shim la phone ne phah ia kano kano ka jingsngewlem sha ki bahaiing bahasem jong ka samla pule kaba khlad noh haduh kine ki sngi, kaba long kaei kaei ka bym lah ban pdiang bad kaba lam sha ka jingsuba sniew.
Kila pynpaw ruh ba ka Shillong Polytechnic kadei ban pyndonkam ia ki kor CCTV ban iarap ia ki samla pule ba kin lait na kino kino ki jingma ia ka met bad iaka jingim ka jong ki.
