Shillong, Nailur 26: U Dr W R Kharlukhi u ba dei u MP ka jylla sha Rajya Sabha mynta ka sngi 26 tarik u Naitung 2024 ula dawa ia ka jingtohkit kaba laitluid halor ki jingkynnoh treikam bym hok hapoh ka Meghalaya Public Service Commission (MPSC). Daka ba kyrpad ruh ba kane ka jingtohkit ka dei ban dep hapoh ka shibnai.
U Dr Kharlukhi ha ka shithi bala phah sha u Myntri Rangbah ka Jylla u Conrad K Sangma ula ong ba nga kwah ban pyntip sha phi ba dang shen kila mih ha ki khubor halor ki jingtreikam bym hok hapoh ka MPSC.
Da kaba kdew ruh ba ka Kong Corina Lyngdoh kaba dei kawei naki dkhot hapoh ka Commission ka ba dei ruh ka kurim jong u Dr Kharlukhi. U la ongruh ba kine ki jingkynthoh kila pynthohbria ia ka iing ka sem jong u. U la ongruh ba khnang ban ioh ka jingshai ia baroh.
U Dr Kharlukhi u la ongruh ba u la dep ban iakren bad ka kurim halor kane ka bynta, bad kala ong ba lada ki shem ba ka leh bakla ka la long ka ba kloi ban leit sha along. U la ongruh ba lada ki lap ba ka kurim jong u ka donkti ma u ruh u long ba lakloi ban hiarnoh na ka shuki MP ka Jylla.
U Dr Kharlukhi u la batai ruh ba ka don ka hukum na ka Iingkashari Supreme Court hakaba 87.5% ka dei ka written bad 12.5 % ka dei ka personal Interview. U la ongruh ba ka jingmih jong kane ka hukum ka dei namar ba don ki jingleh bym hok hapoh ka Assam Public Service Commission (APSC) bad hadien ba tohkit da ki katto katne ki tnad, la shem ba ka don ka jingshisha bad haduh mynta, u Chairman ka APSC u dang don ha along.
U Dr Kharlukhi ula ong ba ki briew kila pynmih ia ki jingkynnoh bamsap bad bunsien ki jingkynnoh ki iaid sha ka NPP hynrei u shem ba kane hi ka dei tang ka kam politics.
