Shillong, Naitung 06: Ka Seng Samla Mawlai Pyllun (SSMP) mynta ka sngi kala leit ban ia kynduh ia u myntri kam pynroi sor u bah Sniawbhalang Dhar ban ia kren halor ka jingwan bret niut naduh Jowai sha ka Mawlai bad ka jingsma kaba mih na ka jaka bret niut bad ka jaka bret ia ki jaboh kiba mih na ki Hospital kiba la bret ha katei ka jaka.
U bah Samran Syiem Genenral Secretary haba kren ha ki lat pathai khubor ha dien ka jingiakynduh ia u myntri la ong ba na ka liang jong u myntri u la kular ban leit ban jurip ia ka marten kaba don ha Mawlai bad ha dien kata ynsa lah ban rai kumno ban weng ia ki jingeh.
Ha kane ka jingiakynduh na ka liang jong ki nongalam ka seng kaba la ialam da u president u bah Samuel Biam kila ia kren ruh, ba ka sorkar ka dei ban leh ei ei halor kane ka jingsma ka jaka bret jaboh kaba la pynsma ia ka thain Mawlai.
Haba ia dei bad ka jingbret ia ki jaboh kiba mih na ki Hospital kiba don ha kane ka nongbah Shillong, u bah Syiem u la kynnoh, haba shna ia ka jaka bret jaboh kiba mih na ki hospital kiba la tip kum ka “Bio Medical Waste” la kynnoh ba ka sorkar kala pynkhein ia ki kyndon ain.
Ha ba ia dei bad ki jingeh kiba mih ha katei ka jaka na ka liang jong ka SSMP kam hun hynrei kin ap ia katei ka jingleit jurip bad ha dien kata kin sa shim ia ka rai, namar ha kane ka jaka la wan bret niut da ki shipai na Rangment bad NEPA ruh.
