Wahkhen, Kyllalyngkot 11: Ka Kur Khongjirem ka la pyllong ia ka jingiakynduh kaba shisien shi snem ha shnong Wahkhen ban wanrah ia ka jingiatylli ka jingialong kawei.
Ha kane ka dorbar, ka kur ka la shim ruh ia ki katto katne ki rai kiba kynthup ba u kpa ne u shynrang na ka jait kur Khongjirem, um lah ban ai jait ia ki khun sha u lada u iapoi kha bad kano kano ka kur hynrei ka jingshim jait ka dei ban beit ban long na ka kmie na kynthei.
Kawei pat ka rai ka long ban kyrshan ia ka jingialeh ka KHADC ban pynneh ia ka jingai jait sha ka kmie ne kynthei.
Ka dorbar kur ka la rai ruh ba kito kiba sah sha kylleng ki jaka, ba kin ym bud tynneng ban pynkylla ia ka jait sha kino kino kat sha ba ki don ha kane ka snieh pyrthei hynrei ki dei ban ai beit da ka jait Khongjirem.
Ka jingialang ha ka jingpyniaid u President bah Wet Khongjirem ka la pyllong ruh ka jingai khusnam ia ki dkhot ka kur kiba la wanrah nam ia ka kur kynthup kiba pass bha ha ki eksamin, kiba la ioh khusnam halor ki kam noh synniang jongki sha ka imlang sahlang.
Kiba shah pynkup burom ki long ka samla Saharalinda Khongjirem, ka Mung Khongjirem, ka Emdur Khongjirem bad u Frederick Khongjirem, kiba la wan shakhmat ha ka eksamin matrik ne SSLC bad u Skhembor Khongjirem uba ioh ia ka khusnam Meghalaya Art and Heritage Award ha ka put ka tem na ka sorkar jylla Meghalaya.
Shwa ia kane, la ioh ruh ka kaiphod kut snem na u Secretary bah Pynjapbor Khongjirem. La ioh ruh ia ka jingiathir ia ai jingmut na ki riew rangbah ka kur kynthup u Rgh. Komik Khongjirem, Babu Kular Khongjirem, bah Skhembor Khongjirem, bad na ki longkmie bad ki samla ka kur.
