Shillong, Nailar 04: Ka jingiakynduh ia u myntri rangbah ka jylla kam shym la ai kano kano ka jinghun bad ka long kumba la kren da u Symbut Myntri Rangbah ka jylla u bah Prestone Tynsong bad u myntri ka tnad pule puthi bah Lahkmen Rymbui, la ong u bah Birbor Riangten nongialam ka seng “Meghalaya Government LP School Contractual Teachers Association”.
Haba kren ha lat pathai khubor ha dien ka jingialang bad u myntri rangbah ka jylla u Conrad K Sangma, nongialam u bah Birbor Riangten la ong ba kane ka jingleh jong ka sorkar ka pynsngewsih ia ki kim tip lypa ia kane ka polisi jong ka sorkar bad kim don aitiar ban ialeh pyrshah ia ka sorkar.
Kum ki nonghikai kiba la shah weng kam kin mih nangne kin lum ia ka jingialang kaba kyrkieh bad kin sa pynbna da kawei pat ka jingiakhih namar kane ka jingiakren kam shym long kaba sei soh, la ong ba kane ka sien kaba kaba hynniew ba kila ia kynduh bad u myntri rangbah ka jylla.
Ha ka jingiakynduh kaba nyngkong u mytnri rangbah la ong ha pyni lynti kumno yn iarap ia ki nonghikai bala shah weng kam, kum ka seng MGLPSCTA kila wat jingtip na kiwei ki jylla kumno ki iarap ia ki nonghikai kontrak bad kila ai sha ka sorkar, ha ka jingiakynduh kaba ar myntri rangbah u la ong ba un sa bishar.
“Kaei kaba sngewsih ka long ba ka jubab kaba ki ngi ioh mynta ka long ba ngam lah ban iarap ia phi, hynrei kynnoh pynban ia ki sorkar kiba la dep, kynnoh ai kiwei, ha ka jingshisha dei ban pynbeit ia ka jingbakla balei kdew kti ia kiwei kiba la dep” la ong u bah Bibor.
U Nongialam ka seng ki nonghikai kiba la shah weng kam la ong ba kane ka dei ka jingialam bakla, lada dei ka sorkar kaba shim ia ka jingbah khleh ia kiwei bad ia ki nongshong shnong ladei ban pythymmai ha kata ka rukom ban nym ktah hynrei ka burom ba kane ka sorkar MDA ka ai ka long ba ki nonghikai kin thiah ha madan.
U bah Bibor la ong ba ia mynta kim pat lah ban rai hynrei kin dang ia kynduh, ka khubor kaba u phah sha ka sorkar ka long ‘Wat nangbah tang ban bishar, hynrei t da nangbha ruh ban synshar” jong ka state bad ki briew kin nym long ki langknie ha ki ain.
