Shillong,Rymphang 16: Ka dorbar mang tyngka jong u snem 2026-2027 kala sdang mynta ka sngi kaba 10 sngi lynter la sdang ia ka jingshong dorbar da kaba tem ia ki 3 tylli ki jingrwai.
U Lamphang ka iing dorbar u Thomas. A. Sangma u la pynbna ha ka iing dorbar ba la ioh ia ka jingbthah na ka ophis jong u lamphang ka dorbar bah jong ka Ri India ka Lok Sabha ban tem shwa ia ka jingrwai Vande Mataram ,bud sa ka National Anthem bad ka jingrwai State Anthem.
Kane ka dei ka sien ba nyngkong naduh ba ka jylla kala pdiang ia ka State Anthem ba la tem ia ka hapoh ka iing dorbar thawain ka jylla ha kaba la rwai ia ka jingrwai ha ki lai tylli ki ktien,ka ktien Khasi,ka ktien Garo bad ka ktien phareng.
Ha ba kren ha ka iing dorbar u Lat ka jylla C.H. Vijayashankar u la ong ba ka dei ka jing angnud ba kumno ban kyntiew ia ka jylla ha ka ioh ka kot shwa u snem 2032, ban poi sha ka thong donkam ia ka jingiatrei lang ban pynlong ia ka jylla Meghalaya kaba bit kaba biang .
U Lat ka jylla u la kdew ba ka jylla Meghalaya ka dei ka jylla kaba la kiew stet bha ha ka ioh ka kot bad ka la wan ba ar ha ka Ri India hadien jong ka jylla Tamil Nadu da kane ka jingkiew ka ioh ka kot ka jylla kan poi sha ka thong ha u snem 2032.
Ha kane ka sngi u Lat ka jylla ha ka jingkren ka jong u u la ktah ia baroh ki tnad sorkar kiba kin sa pyntrei ha kane ka snem mang tyngka ,naduh ki surok ,ka bor ding electric, ka koit ka khiah ,ka pule ka puthi bad kiwei kiwei de kiba ka sorkar kan sa pyntrei kam ha kane ka snem mang tyngka 2026-2027.
