Shillong, Kyllalyngkot 15: U myntri rangbah ka jylla u Conrad K Sangma u la ong ba ia ka kaiphot jong ka Expert Committee kaba ia dei bad ka bhah kam ha kane ka jylla kaba la tip kum ka Reservation Policy yn sa pynbna paidbah ia ka jingai jingmut ka Kommittee ha ka sien shong dorbar ka ban sawan ka ban sa long ha u bnai Rymphang.
Haba jubab ia ka jingkylli ki lat pathai khubor u myntri rangbah la iathuh ba u Chief Secretary u dang peit bniah bad kam dei kaba suk ban shu ai kumto namar kane ka kam ka long ba don kam bha ha kaba man u phulstop bad koma ruh ki don la ka jong ka jingmut kumta hap ban da leh bniah bha.
La ba ka kaiphot kaba la ai da ka Expert Committee ka don da ki bun hajar sla, kumta kam dei kaba suk ban shu leh khlem da peit bniah bha ia kane, la ong ba hapoh kine ki shiphew sngi la lah ban pyndep bad kin sa ia kren ha ka cabinet ia kane.
U myntri rangbah la ong ba ia kaei kaba ka Expert Committee kala ai jingmut ka sorkar kan pyntip paidbah ban ia tip. kam bha ban shu iathuh haba ym pat dep ka jingpeit bniah bad la ong ba ha ka sien shong dorbar yn sa rah hapoh ka iing dorbar thawain ka jylla.
