New Delhi, Jylliew 18: U Prataprao Jadhav, Myntri Khynnah ka tnat Ayush (Independent charge), u la ban jur ba ka phang mynta u snem ‘Yoga for Self and Society’ ka pyni ia ka ar bynta jong ka yoga ban kyntiew ia ki briew bad ka jingbha jong ka imlang sahlang.
“Ka yoga ka kyntiew ia ka met, ka jingpyrkhat bad ka jingngeit bad ka kyntiew ruh ia ka jingiasuk ha ka imlang sahlang,” u la ong. “Ka jingiashim bynta da ki million ngut ki briew ha kine ki snem ba la dep ka pyni ia ka jingktah ka yoga ia ki jaitbynriew.”
U la pynbna ba u Myntri Rangbah Duh u la thoh shithi sha baroh ki Gram Pradhan, ban pynshlur ia ka jingiashim bynta ki briew bad ban pynpur ia ka yoga sha ki jaka nongkyndong. Ka jingrakhe IYG mynta u snem kan long ha Srinagar, ha kaba yn ialam biang sa shisien da u Myntri Rangbah Duh, Narendra Modi.
Ia kane u la ong ha ka jingiakynduh bad ki lad pathai khubor mynta ka sngi, ha shuwa ka bynta kaba 10 jong ka International Day of Yoga.
U Myntri Rangbah Duh u la don ka bynta kaba khraw ha ka jingpynsaphriang ia ka yoga sha kylleng ka pyrthei. Naduh u 2015, u Myntri Rangbah Duh u la ialam lynti ha ki jingrakhe ia ka IDY na ki jaka bapher bapher ba kynthup ka Kartavya Path ha Delhi, Chandigarh, Dehradun, Ranchi, Jabalpur, bad ruh ka United Nations Headquarters ha New York.
Ka jingialam lynti jong u ka la kyntiew bha ia ka jingsngewtynnad ki briew ia ka yoga bad ka jingioh jingithuh ka yoga, la ong u Jadhav.
U la ong ba hadien ka jingtyrwa da u Myntri Rangbah Duh sha ka United Nations General Assembly (UNGA) ha u Nailur 2014, ha ka 11 tarik u Nohprah, 2024 la rai lang baroh da kawei ka sur ban rakhe ia ka 21 tarik u Jylliew kum ka International Day of Yoga. Kane ka la dei ka jingjop ha ka jingiadei bad kiwei kiwei ki ri bad kane ka la wanrah ia ka jingithuh ka pyrthei ia ka Yoga.
Ha kine ki 10 snem la dep, ka IDY ka la ioh saw tylli ki rekod ha ka Guinness Book of World Records. Ha u 2015, 35,985 ngut ki briew jong ka India ki la leh yoga ha Rajpath ha ryngkat u Myntri Rangbah Duh, Narendra Modi. 84 tylli ki ri ki la iashim bynta ha ka jingleh yoga ha kawei ka jaka bad katba dang iaid ki snem, ka jingiashim bynta na kylleng ka pyrthei ka dang kiew bad ha u snem 2023, haduh 23.4 klur ngut ki briew na kylleng ka pyrthei ki la iashim bynta ha ka prokram leh yoga.
U Myntri AYUSH u la pyllait paidbah ruh ia ka ‘Common Yoga Protocol Book in Braille’ Script ban kyrshan ia kito kiba don jingeh ha ka bor iohi kiba kwah ban nang kumno ban leh yoga. U la pyllait paidbah ruh ia ka comic jong u Professor Ayushman shaphang ka Yoga. “kane ka kot kan iarap ia ki khynnah ba kin nang ban leh yoga ha ka rukom kaba khring ia ki bad kaba ki sngewtynnad ruh,” u la ong.
Kum ka sienjam kaba kyrpang, mynta u snem , ka Indian Space Research Organisation (ISRO) kan pynlong ia ka sienjam ‘Yoga for Space’ ban rakhe ia ka International Day of Yoga 2024.
Baroh ki stad science bad ki ophisar ka ISRO kin leh yoga lang katkum ki jingbatai Common Yoga Protocol. Ka kynhun na ka Gaganyaan project ruh kin iasnoh kti lang ha ka prokram yoga ha kylleng ka pyrthei na ka bynta ka International Yoga Day da kaba leh yoga ha kane ka sngi.
Ban kyntiew ia ka teknoloji bad ki start-up kiba trei ha ki kam yoga, ka Tnat ka la pynkhreh ia ka Yoga Tech Challenge ha ka rynsan MyGov bad rynsan MyBharat jong ka Sorkar India kaba thmu ban lap bad kyntiew ia ki start-up ne ki riew shimet kiba la shna ia ki tiar kiba iadei bad ka yoga, kiba la shna ia ki software ne ki tiar ba iarap ha ka jingleh yoga.
U Vaidya Rajesh Kotecha, Secretary, Ayush u la kren shaphang ka jingiaid lynti jong ka IDY naduh ba la sdang ia ka da kaba ban jur halor ka bynta jong ka ban kyntiew ia ka koit ka khiah, ka jingkyntiew ia ki jinglong kiba bha ha ka imlang sahlang bad ruh ka jingsngew iatylli.
“ka yoga ka wanrah ia ka jingiatylli hapdeng ka met bad ki jingmut jingpyrkhat, ka kyntiew ia ka jinglong ryntih, ka jingdon ka jingmut kaba skhem, bad ka bha ka miat,” u la ong. U la kynmaw ia ka jingrakhe lyngba ki lad digital ha ka por jong ka khlam kaba la pyni ia ka jingkongsan jong ka yoga ba ioh ia ka met bad ki jingmut jingpyrkhat kiba khlain.
U la kdew ruh sha ka ‘Jingtrei lang jong baroh ki bynta ka Sorkar’ ha ka jingrakhe ia ka International Day of Yoga ha kaba u la ong ba ka jingiatreilang jong ki tnat sorkar pdeng bad ruh ki Sorkar Jylla ka dei ban pynthikna ia ka jingrakhe kaba iar man u snem. Ha ryngkat ki sorkar jylla, ki union territory ruh ki iashim bynta ha ka IDY 2024.
Ka kynhun National Ayush Mission ha kylleng ka ri ruh ka pynlong ia ki prokram IDY. Kane ka jingiatreilang ka pyni ia ka jingkongsan jong ka yoga ha ka jingkyntiew ia ka koit ka khiah bad ka bha ka miat ha baroh ki bynta jong ka Imlang sahlang.
Ha Delhi, ka tnat Ayush ka la iatreilang bad ka NDMC (New Delhi Municipal Corporation), ASI (Archaeological Survey of India) bad DDA Delhi Development Authority ban pynlong ia ki prokram paidbah shaphang ka yoga ha ka 21 tarik u Jylliew 2024. Ka tnat ka la ioh ruh ka jingkyrshan na ki kynhun kum ki Brahma Kumari, Art of Living, Patanjali, Gayatri Parivar, Isha Yoga Centre, Heartfulness bad kiwei kiwei.
Khnang ban khring ia ki paidbah, ka tnat Ayush ka la pynlong ia ki jingiakop bad ki prokram bapher bapher. Kawei na ki sienjam ba kham kyrpang ka dei ka jingiakhun “Yoga with Family” Video ba la pynlong ha ka jingiatreilang bad ka Indian Council for Cultural Relations (ICCR) ha ka rynsan MyGov bad MyBharat.
Kane ka jingiakhun ka pynshlur ia ki longiing na kylleng ka pyrthei ba kin iashim bynta ha ka jingrakhe ia ka IDY 2024, da kaba pyni ia ka jingkmen ba ka yoga ka wanrah bad ruh ka jingpynskhem ia ki jingiadei hapdeng ki dkhot jong ki longiing. Ka tarik ba khatduh ban phah ia ki video ka dei ka 30 tarik u Jylliew, 2024.
Kito kiba iashim bynta ha ka jingiakhun #YogaWithFamily Video ki lah ban jop ia ki buskit bapher bapher katba ki pynsaphriang ruh ia ka khubor jong ka yoga na ka bynta ka koit ka khiah bad ka jingiatylli.
Ka tnat ka la pynmih ruh shibun ki hashtag ban pyndonkam baroh kawei ka pyrthei, ka International Day of Yoga 2024, Yoga For Self And Society, Yoga With Family, and IDY 2024. La pynshlur ia ki briew na kylleng ka pyrthei ba bud bad pyndonkam ia kine ki hashtag bad iasnoh kti lang ha kane ka kam na kylleng ka pyrthei.
