Shillong, Nohprah 18: Ki paidbah nongshong shnong kiba hap hapoh 50 kilometer sawdong jong ka Lafarge ka kompeni tih mawshuh kaba don ha rung ka shnong Nongtrai kila ioh shibun ki kam pynroi lyngba ka Special Purpose Vehicle Society, kum ka jingshna ia ki surok, ki iing dorbar ki kam ri jingri, ki kam rep bad shibun ia ki kam kiba ia de bad ki shnong ki thaw.
Ka Special Purpose Vehicle Society naduh u snem 2013 kala sdang ia kawei ka skhim kata ka long ban ai jingkyrshan ia ki samla pule kiba dei na kito ki shnong kiba hap ha ka jingpeit jong lada ki don ki khun samla kiba kwah ban leit pule sha bar ka jylla Meghalaya kum ka jingpule Doktor, Engineer, Nurse bad kiwei kiwei ki jingpule katkum kane ka juk kaba mynta.
Haba shim naduh u snem 2013 haduh mynta 2025 ka Special Purpose Vehicle Society kala kyrshan haduh 245 ngut, ha u snem 2013 ki long 10 ngut , 2016 ki don 61 ngut, 2018 ki dei 49 ngut, 2021 ki long 31 ngut, 2022 ki don 23 ngut, 2023 ki long 15 ngut, 2024 ki don 36 ngut bad 2025 ki long 20 ngut.
U Bah Peter S Dkhar Chief Executive Officer la ong ba ia ki aplikoshon ki wan lyngba ki shnong ha dien ba kila pynbiang ia ki jingdon kam baroh, ka ophis ka sa mang pisa bad ia ka pisa ka phah sha kito ki jaka pule bad ka jingbei pisa ka long 80 persent na ka jinglut ha kano kano ka jingpule kaba ki samla ki leit bad kane ka jingbei pisa ka long haduh ba kin da dep ia ka jingpule jong ki.
