Shillong, Rymphang 25: u Myntri ka koit ka khiah u bah Wailadmiki Shylla u la jubab ia ka jingkylli ba la wanrah da ka Dr. Mehtab C.A. Sangma la ong ba haduh u snem 2024 kiba don ia ka jingpang ia u khniang jingpang Niangkhulia (HIV/AIDS) ki long 9674 ngut hynrei haduh u bnai Kyllalyngkot 2026 kiba don ia u ne u khniang jingpang ka la kiew sha ka 10,293 ngut.
Ka jingiap kiba don ia u ne u khniang jingpang ha kine ki 10 snem ba la leit noh ki long 749 ngut, ha East Khasi Hills 435 ngut, West Khasi Hills 8 ngut, Eastern West Khasi Hills 16 ngut, Ri Bhoi 51 ngut, South West Khasi Hills 7 ngut, East Jaintia Hills 90 ngut, West Jaintia Hills 123 ngut.
Ha ri lum Garo East Hills 4 ngut, North Garo Hills u wei South Garo Hills 3 ngut, West Garo Hills 9 ngut bad South West Garo Hills 2 ngut, hynrei ka long kaba kongsan ruh ban tip ba baroh kiba khlad ka dei na ka Opportunistic Infection (OIs) bad kam shym don kata ka jingong kaba ki iap na ka jingpang Niangkhulia. Kumba ka long mynta ka long kaba sngewsih ba ka jylla Meghalaya ka la wan banyngkong ha ka jingkiew stet kiba ioh ia u ne u khniang jingpang.
U Myntri u la iathuh ba ki don 392 tylli ki jaka test ban lap la ki don ne em ia kane ka jingpang bad kane lah ban leh da ka jingmynjur jong u ne ka ym lah ban leh kumto khlem da mynjur lang haduh mynta hi ki don saw tylli ki kali ki ba leit kylleng kylleng ban test ia ki briew lada ki kwah.
U Myntri u la ong ba da ka jingdon ia ki lad jingsumar wat la ym pat lah ban pynkoit pura ia kane ka jingpang hynrei da ka jingdih tista ia ki dawai ha ki jaka ba ka sorkar kala buh kum ki ART Centre ha kaba ki briew ki lah ban leit shim ia ki dawai ha kaba ki lah ban long lem kumba long lem kiwei. Ha ka jylla ki don tang san tylli ki ART Centre ha East Khasi Hills ka don ha Civil Hospital bad ha NEIGRIHMS.
Ban iakhun pyrshah ia kane ka sorkar kala wanrah ia ka skhim ban pyntrei ha kine ki san snem ban wan ha ka jingmang pisa kaba T.25/- klur, na ka bynta u snem mang tyngka 2025-2026 ka Meghalaya Aids Control Society ka la ioh ia ka jingkyrshan na ka National Aids Control Programme (NACP) kala ioh T.17.80/-klur.
