Shillong, Jymmang 22: Ka Jaintia National Council Khliehriat Circle hadien ka jingioh na ki kmie ki kpa jong ki khynnah skul halor ka jingeh bad ki ia kynduh khamtam ha ka por ba ki leit buh bad shaw skul ia ki khun, kila dawa na u Deputy Commissioner ka East Jaintia Hills ban ai noh da ka No Entry ia ki kali heh.
Katkum ka kyrwoh khubor na u Bah Symboh Baiar Sumer uba dei u General Secretary ka JNC – KC u la ong, kane ym tang ba ka buh jingma ia ka jingim jong ki khynnah skul hynrei ka pynlong ruh ia ka jingdheng ka kali kaba jur kaba lah ban neh da ki kynta namar ka jingioh lad ki kali heh ban iaid ha ka por leit skul jong ki khynnah skul.
U Bah Sumer u la ong, Ka JNC-KC da ka jingsngewkhia ka la leit ia kynduh ia u DC ka East Jaintia ban pynsngew ia kane ka jingeh kaba ki khynnah skul ki ia kynduh ha ka por ba ki leit bad mih na skul man la ka sngi namar ba ki hap ban kam sha shilliang ia ka surok bah NH-6 ban poi sha la ki jong ki skul bapher bapher bad khamtam ia ki skul ba don ha Khliehriat.
Ha kane ka jingiakynduh ka JNC-KC ka la ai jingmut ia u DC ba dei u Khlieh jong ka District ban ai noh da ka No Entry ia ki kali heh khamtam ha ka por ba leit bad wan skul ki khynnah khnang ban pynduna ia ka dheng kali bad ruh ban pynsuk ia ki khynnah skul ban poi sha la ki jong ki skul khlem kano kano ka jingma ia ka jingim jong ki, ong u Bah Sumer.
Shuh shuh u Bah Sumer u la iathuh ba u Deputy Commissioner, u la kular ban shim khia ia kane ka jingdawa jong ka seng ban ai noh da ka No Entry naduh ka por 8 baje mynstep haduh 9 baje mynstep kaba dei ka por ba leit skul ki khynnah skul bad naduh ka 2 baje noh phai sngi haduh ka por 3 baje janmiet kaba dei ka por wai skul, bad ia kane No Entry na ka bynta ki kali heh yn pyntrei kam naduh lashai ka sngi.
