Shillong, Meghalaya, 13 Rymphang 2026: Ka Assam Rifles Sentinels Cup ka la wanphai biang na ka bynta ka sien kaba 4, kaba la buh ban pynlong naduh ka 17 haduh 27 tarik Rymphang 2026, bad yn pynlong ha ki jaka bapher bapher ha nongbah Shillong.
Da kaba tei halor ka pateng jong ki jingïalehkai jong ka ba mynshuwa, ka Sentinels Cup ka dang ïai bteng ban long kum ka rynsan ban pyni ïa ka sap ïalehkai phutbol jong ka thaiñ, ban kyntiew ïa ka jingiatreilang ha ka imlang sahlang bad ban pynsaphriang ïa ka mynsiem ïalehkai bad ka jingïatylli.
Naduh ba la sdang ïa ka, ka Sentinels Cup ka la long ka dak jong ka kolshor ialehkai phutbol kaba riewspah jong ka thaiñ Shatei Lammihngi. Kane ka lympung ïalehkai kaba la shim ia ka kyrteng na ka Assam Rifles, ki “Nongiada ia ka thaiñ shatei lammihngi,” ka la sakhi ïa ka jingshitrhem kaba khraw na ki kynhun ha kylleng ka thaiñ.
Ka jingïalehkai kaba khatduh, kaba la long ha u snem 2025, ka la wanrah lang ïa ki nongïalehkai phutbol kiba tbit. Mynta u snem la khmih lynti ba ka jingïakob kan long kaba kham shitrhem bad kham shongshit namar la plie ïa kane ka lympung ïalehkai na ka bynta ki shynrang bad kynthei.
Kumba ju long ha kane ka lympung ïalehkai Assam Rifles Sentinels Cup yn sakhi ïa ka jingïashim bynta ba bun na ki klob kiba na ka jylla Meghalaya, kumjuh ruh na ka Assam Rifles, Indian Army bad Meghalaya Police.
Ha kane ka lympung ïalehkai yn don mar phra tylli ki kynhun ha ka thup jong ki Shynrang bad Kynthei ki ban ïakhun lyngba ki jingïakhun ha ki kynhun, bud sa ki knockout round, ka ban ïalam sha ka phainal. Ka jingialehkai phutbol kan long kaba shitrhem, ha kaba ki kynhun kin pyni ia ka jingtbit.
Kane ka bynta jong ka Sentinels Cup ka kular ban wanrah shuh shuh ïa ka jingshitrhem, ha kaba yn don ka jingplie paidbah ba iphuh iphieng ha ka 17 tarik Rymphang 2026, ha SSA 1 Ground Polo.
Ka kynhun kaba jop ym tangba ka ïoh ïa ka burom ban mihkhmat ïa ka klob/jylla ne ka unit jong ka hynrei kan ioh ruh ia ka khusnam pisa kaba T.3,00,000/- (lai lak tyngka) ryngkat bad ka Sentinels Cup Trophy.
Kane ka lympung ialehkai kan kut ha ka jingïakhun ia ka phainal ha ka 27 tarik Rymphang 2026 na ka bynta ki Shynrang bad Kynthei, ha ka jaka ba pyni ia ka jingitynnad ka thaiñ Shatei Lammihngi.
Ka jingïalehkai ba nyngkong kan long ha ka 17 tarik Rymphang 2026 ha ka por 2 baje bad ka phainal kan long ha ka 27 tarik Rymphang 2026 ha SSA 1 Ground Polo. Ym donkam ban siew bai rung ha baroh artylli ki jingialehkai. La khot sngewbha ia baroh ban sakhi ia kane ka jingiakhun bad ban wan shakhmat ban kyrshan ia ki kynhun ha ka jingialehkai kaba shitrhem bha.
Ha kaba iadei bad ka thong jong ka ban kyntiew ïa ka kam ïalehkai bad ban pynïasoh ïa ki samla jong ka thaiñ Shatei Lammihngi, ka Assam Rifles ka dang ïai bteng ban pyndonkam ïa ka Sentinels Cup kum ka lad ban pynshlur ïa ki samla jong ka thaiñ ban kiar na ki kam lehnoh bad u drok, katba ka pynshlur ïa ki ban pdiang ïa ka bor ba bha jong ka kam ïalehkai.
Ka Assam Rifles ka thrang ban kyntiew ïa ki sap ïalehkai phutbol lyngba ka MoU jong ka bad ka Bhaichung Bhutia Football Academy bad ka Assam Rifles Public School (Sports), kaba trei shitrhem ban wad ïa ki samla jong ka thain kiba don sap ha ka jingialehkai phutbol.
Ka Sentinels Cup kam dei tang ka lympung ialehkai phutbol-kadei ka jingrakhe ia ka kolshor, ka jingiatylli, bad ka mynsiem jong ka thain shatei lammihngi. Ka long kum ka lad kaba kongsan na ka bynta ki samla ban pyni ia la ka sap bad ban shim ia ka sienjam kaba nyngkong sha ka kam ialehkai phutbol, hapoh ka jingialam jong ki coach bad ki nonghikai kiba tbit.
Ka jingïatreilang jong kane ka lympung ïalehkai bad ka Khelo India Abhiyan bad ka Fit India Movement ka nang pynkhlaiñ ïa ka bynta jong ka kum ka nongplie lad ïa ka jingkylla kaba bha ha kane ka thaiñ.
Ka bynta kaba 4 jong ka Sentinels Cup ka la urlong da ka jingkyrshan jong ka NEEPCO, kaba la ïasoh bad ngi kum ka nongkyrshan ia ka bynta jong kane ka lympung ialehkai, kaba ka jingaiti jong ka sha ka kam ïalehkai bad ka jingpynkupbor ïa ki samla ka dang ïai bteng ban pynwandur ïa ka lawei jong ka phutbol ha ka thaiñ Shatei Lammihngi. Ka jingsngewnguh jong ngi kalong ruh ia ka Hill Myna Magazine kum ki nongiatreilang ha kane ka bynta jong ka Sentinels Cup.
