Shillong, Rymphang 21: U Myntri rangbah ka jylla haba jubab ia ka jingiatai halor ka jingkren jong u Lat ka jylla hapoh ka iing dorbar ha ka sngi sdang la ong ba, ka jingkren ka kdew ia ki kam kiba ka sorkar kala leh bad ia kaei kaba ka sorkar kan sa leh na ka bynta ka jylla.
U myntri rangbah u la kren shai ba ha ka jingkren jong u Lat ka jylla ym shym la pynrung lut ia baroh hynrei la thoh tang ia ki phang ki phang ba kongsan, haka juh ka por la ong ba yn nym lah ban jubab ia baroh ki jingkren ki dkhot ka iing dorbar hynrei ia kaei kaba ki kren la don ha ka jingthoh.
Ha kane ka jingkren ki bynta kiba kongsan kiba u myntri rangbah ula pynshai ka lon ba, ia ka jingthih dewiong mynta yn sa ioh ha kane ka snem mangtyng ka kaba thymmai ka ban long katkum ka juk satad saian kaba mynta, la ong ba mynta dang ap sa tang ia ka jingbit na ka tand khlaw ka sorkar peng.
Haba phai sha ka jingslem jong kito kiba apply ban ioh shna ia ki iing basa u myntri rangbah ka long ba kiba la ioh ia ka jingmynjur ki don 468 tylli bad ka jingpynslem ban ioh ia ka pisa dei na ka daw jong ki bank ia kaba ka sorkar kala khot ia ka jingialang bad la lah ban pynbeit, la ithuh hapoh ka iing dorbar ba ha kine ki san snem ban wan yn shna sa 3000 tylli ki iing basa.
Haba ia dei bad ka jingai jigbit ban plie ia ki jaka ai jinghikai ka kommittee ka shong shisien shisnem bad ka sorkar kan sa pet la da don kam ban shong ar ne lai sien ruh ia ka jignialang, haba ia dei bad ka bai klas ki samla pule ka sorkar kala pan jingkhien na ki kolej ha dien kata ka sorkar kan shim ia ka rai.
Haba phai sha ki surok la ong ba ka jingpynkhreh ia ka DPR ban shan surok ban iaid saw tylli ki kali na Umiam sha Ratachera, ia ki surok kiba ym lah ban pynrung ha ka PMGSY pat yn pynlong lyngba ka skhim CM Connect.
Haba ia dei bad ki District Council, kaba ka GHADC bad ka JHADC kam lah ban siew ia ka tulop, u myntri rangbah ka jylla u la kren shai ba kam dei ka kam jong ka sorkar ban siew ia ka tulop jong ki, hynrei ka dei ka bynta jong ka sorkar ban kan iarap lyngba ki bhah kaba kidei ban ioh.
Haba ia de bad ka CUET eksam la ong baroh ki Kolej ha kane ka jylla ki pyniasoh bad ka skul bah NEHU kaba dei jong ka sorkar pdeng dei halor ka bynta ba ki samla pule kin hap ban thoh ia ka CUET hynrei da ka jignshm khia ka sorkar ka lah ban pynlait ia ki khynnah na katei ka eksam.
Ha ka juh ka por la pyntip ba kala don jignpynkreh ban don ia ki jaka thoh eksam CUET ha jylla bad kumba ka long ki khynnah ban thoh ia kane ka eksam ki don haduh 35197 ngut bad ia kine baroh la pynkhreh ba kin hap ban shim ia ki khynnah da kaba pynlong ia ka eksam lai sien ha ka shisngi.
Kitei ki long ki mat kiba kongsan bala jubab da u myntri rangbah kajylla bad u la ong ba ia kaei kaba ki dkhot ka iing dorbar kila kren la thoh bad la shim ruh ia ka jingai jingmut bad ka sorkar kan sa peit ia kaba don kam na ka bynta ka jingbha ka jylla, ha dien ba la ioh ia ka jingpynshai u bah Ronnie V Lyngdoh bala wanrah ia ka jingkwah ban pynkylla la weng noh ia kaba ia iing dorbar kala pdiang.
