Shillong, Iaiong 23: Kum shi bynta ban weng ia ka jingeh ba ki nongrep ka jylla ki ia kynduh, ka National People Party, Farmers Front Meghalaya State Unit kala thung ia ki District President ha Ri-lum Khasi, Jaintia bad Ri-Bhoi District bad la aipor shibnai ba kin thaw ia ki District bad ki Block Committee.
Ka Farmers Front mynta ka sngi kala pynlong ka jingialang ha ophis trei kam jong ka NPP ban sngewthuh ia ka jingeh ba ki nongrep ki ia kynduh bad kumno ruh ba kin lah ban iarap ia ki lyngba jong ka sorkar.
Haba kren sha ki lad pathai khubor hadien ba la wai ka jingialang, u shongknor jong ka Farmers Front uba dei ruh u nongai ktien jong ka NPP u Bah Himalaya M Shangpliang u la ong, “Ka jingialang kala rai ban kyrpad ia ka Sorkar Jylla ba kan pynkiew noh ia ka dor u synsar, ban leh eiei halor ka jingiap tram jong ki diengkwai bad ban pynkhlain ruh ia ka jingialap sha ki nongrep halor ka CM ASSURE scheme”.
U Bah Shangpliang u la iathuh ba ka dor u synsar kala hiar bha bad kumba ngi sngewthuh na ki Nongrep ba ka dor bala buh da ka Sorkar ka long kaba rit palat bad kumta, la rai ban leit iakren ia ka Sorkar ba kan pyrkhat biang ia ka dor jong u synsar bad lada lah, ban pynheh noh ia ka dor.
U Bah Shangpliang u la ong, “Ka dor jong u synsar ha ka Grade-I la buh T.55 shi kilo, ha ka Grade-II ha ka dor T.40 bad Grade-III ha ka dor T.30 shi kilo” bad bynrap ruh “Namar kata, ngin sa leit iakren ia ka Sorkar bad ia ka Tnad Agriculture ba kan shong pyrkhat bad bishar biang lada lah ban leh eiei ia kane” ula ong.
Halor ka jingiap tram jong ki dieng kwai, u Bah Shangpliang u la ong ba ka NPP Farmers’ Front kan kyrpad ia ka tnad Agriculture bad Horticulture ba kin shimkhia mar mar ban teh lakam da kaba synreit da ki kynja dawai ia ki diengkwai bad kumjuh ban ai jingiarap ruh ia ki nongrep kwai.
Haba ban jur ia ka jingkongsan ka CM ASSURE scheme, u Bah Himalaya ula ong ba kala don ka jingslem ha ka jingpynrung kyrteng ia ki nongrep hapoh kane ka skhim bad ka Party (NPP)kala rai ban kyrpad ia ki borkhmih ha ka Tnad Agriculture bad Horticulture ba kin sngewbha ban pynsted noh ia ka jingpynrung kyrteng.
Kat haduh ka 21 tarik Iaiong, haduh 5657 ngut ki nongrep kila pynrung kyrteng ialade hapoh ka CM ASSURE scheme bad u la pyntip ruh da ka jingshim khia u symbud myntri rangbah ka jylla u Bah Prestone Tynsong u dawai sboh mynta u la poi ha Khanapara bad kawei ka kam kaba sah bad ka long ban ioh ia ka jingmang na ka Tnad.
