Shillong, Jymmang 09: U Bah Paul Lyngdoh EM ba dei peit ia ka Town Committee jong ka KHADC mynta ka sngi u khot ia ka jingialang jong ki EM ban ia kren halor ka jingpynbna ka sorkar ban aiti sha ki District Council ia ka bor ban ai jingbit ban shna iing ha ki jaka ba hap hapoh ki jaka jong ki District Council.
Haba kren ha ki lad pathai khubor, u Bah Paul u la iathuh ba ka jingpynbna sorkar kaba la pynmih ha ka 01th Rymphang 2019 ban ai ba la aiti sha ki District ia ka jingai jingbit ban shna iing kam long kaba shai namar la thoh ba ki paidbah ki lah ban shim ia ka jingbit na District Council lane na ka MUDA.
Kane ka jingpynbna jong ka sorkar kam shym la batai shai ia u pud u sam ban trei kam bad mynta ki paidbah ki don ha ka jingeh namar ka MUDA kam ai shuh ia ka jingbit ban sna iing ha kito ki jaka ba hap hapoh jong ki District Council. Kane kala buh ia ki paidbah ha pdeng ka jingeh kaba khraw khamtam ia kito kiba pan ram ban shna iing.
Halor kine ki jingeh na ka liang jong ki EM kiba la ia don lang ha kane ka jingialang mynta ka sngi bad kum u EM ba dei peit ia ka Twon Committee kila shim ia ka rai ban ia kren bad ka sorkar ban ioh ia ka jingshai ha kaba ia dei bad jingai jingbit ban shna iing ia ki paidbah.
Namar ba ka KHADC kam pat don ia ka ain ban shna iing, ia mynta ka KHADC kan ai ia ka jingpynshisha bad ha ka juh ka por ban ong ba ka KHADC ka dang pynkhreh bad u la ong ba ha dien ba la ia shai bad ka sorkar ia ka jingtrei kam ka KHADC ka lah ban pyndep ia kane ka ain sha iing hapoh hynriew bnai.
Ki EM kiba la ia don ha kane ka jingialang mynta ka sngi ki long u Bah Pyniaidsing Syiem Deputy CEM, Bah Titostarwell Chyne bad ki ophis jong ka KHADC ha ka jingiadon lang u Bah Robert J Kharjahrin nongbai buid ka Executive Committee.
